Accessibility links

чәршәмбе, 7 декабрь 2016, Казан вакыты 23:31

Rusiä prezidentı qüwät ministrlıqların reformalaw eşen däwam itä


Rusiädä däwlät idaräse strukturaların reformalaw däwam itä. Xäzer inde bu eş qüwät ministrlıqlarına da kilep çitte. Sişämbedä prezident Putin Rusiäneñ eçke eşlär ministrlığı häm federal'' migratsiä xezmäte eşçänlegen kamilläşterüne maqsat itep quyğan färmanın imzaladı. Aña qädär ul Rusiä qorallı köçläreneñ yuğarı idaräsendä dä qayber üzgäreşlär yasağan ide.

Eçke eşlär ministrlığı eşçänlegen kamilläşterü turındağı färmanın imzalar aldınnan ğına prezident Vladimir Putin, näq ber kön elek, Rusiä qorallı köçläreneñ baş idaräse citäkçese Anatoli Kvaşninne eşennän alğan ide, xörmätle tıñlawçılar. Anıñ belän bergä tağın öç yuğarı däräcäle xärbi başlıq ta almaşındı. Rusiä ğäskärendä bu üzgäreşlär inde küptännän kötelgän ide. Mäskäw Kremle şaqtıy waqıt ilneñ qorallı köçlären 21-nçe ğasır taläplären ütärlek däräcägä kütärü maqsatın quya. Läkin älegä qädär anda, "ber qazanda ike täkä başı" wäzğiate buldı, general Kvaşninnıñ ğäskärne reformalaw ölkäsendäge qaraşları, prezidentnıñ yaqın tarafdarı, saqlanu ministrı Sergey İvanovnıqınnan şaqtıy ayırıla ide. Östäwenä, Anatoli Kvaşninneñ ğadi xärbilär arasındağı abruyı bik tübän, xätta yuq däräcäsendä buldı. Qayber küzätüçelär fikerençä, Kvaşnin Rusiä ğäskäriläre arasında iñ näfrät itelgän general ide. Bu xaqta, ayırım alğanda, "New York Times" basması aşa mäğlüm xärbi belgeç Pavel Felgenhauer belderde. Qorallı köçlärneñ baş idaräsen citäklägän general Kvaşnin iseme berençe çiratta, Mäskäw öçen şaqtıy yaman barğan ike çäçän suğışı, bigräk tä 1995-nçe yılda Groznıyğa yasalğan uñışsız häm zur yuğaltularğa kitergän höcüm belän bäyle. Anı eşennän aluğa äzerlek inde küptännän alıp barılsa da, sabırlıq käsasen tutırğan soñğı tamçı bulıp uzğan ayda İnguşetiädäge höcüm tordı diärgä bula. Kvaşnin belän bergä eşlärennän tağın öç yuğarı däräcäle xärbi başlıq alındı. Alar arasında eçke eşlär ministrlığı ğäskärlären citäklägän general Väçeslav Tixomirov ta bar. Aña qädär prezident Putin Rusiä qorallı köçläreneñ baş idaräse wäkalätlären çiklägän häm anı Saqlanu ministrlığınıñ ğadi ber bülegenä äyländergän ayırım ber färman çığarğan ide. İke xärbi citäkçeneñ xakimiat öçen tartqalaşuı şulay itep ministr Sergey İvanov ciñüe belän tämamlandı. Mäskäwdäge xärbi belgeç Aleksandr Golts fikerençä, baş idaräneñ şuşı yaña xälendä eşli başlawı sürätendä Anatoli Kvaşninneñ anda inde kiräge qalmağan.

Audio, Aleksandr Golts

Golts, üzeneñ zihni mömkinlekläre yağınnan Kvaşnin bu eşkä, urınbasarı Yuri Baluyevskigä qarağanda azraq turı kilä, şuña kürä bar närsä dä mantıqi kürenä dip belderä. Çeçnä nizağın fäqät qoral belän genä beterep bula dip isäpläwçe Kvaşninnän ayırmalı bularaq anıñ urınına kilgän Baluyevski bu mäs''älädä başqa törleräk fiker bäyän itä.

Audio, Yuri Baluyevski

Tormışınıñ soñğı 10-12 yılın qulına qoral ğına totıp yäşägän yäş keşene tiz genä eşlätä başlaw, cir sörderü zur problema buluın tanığan Baluyevski, moña xärbi çişeleş yuq, berdänber yul - Çeçnäneñ iqtisadi yañarışı, xalıqnı eş belän tä''min itü, xätta tärbiäläw dip belderä. Soñğı qararlarnı birüçe häm färmannarnı imzalawçı Vladimir Putin dä çişeleşne näq menä şulay küräme, monısı inde başqa mäs''älä.

Kärim Kamal
XS
SM
MD
LG