Accessibility links

сишәмбе, 6 декабрь 2016, Казан вакыты 13:11

Rusiä xökümäte YUKOSnıñ nigez taşın cimermäkçe


Russiä xökümäte Sişämbedä salım burıçın qaplau öçen Yukosnıñ töp produksiä öleşen konfiskatsiäläp sataçağın belderde. Yuganskneftegaz şirkäten tartıp alu, Yukosnı nefte reservasınıñ öçtän ike öleşennän häm kön sayın çığarılğan nefteneñ 60 protsentınan mäxrum itüne añlatır ide. Bu adım üz vaqıtında Könbatışneñ ere nefte şirkätläre belän konkurensiägä kerergä omtılğan Yukosnı Russiä nefte bazarında täsiren yuğaltqan ikençe sıynıf uyınçı xälendä qaldıraçaq. Bu xaqta amerikan gazetası "Washington Post"ta basılıp çıqqan maqäläneñ eçtälege.

Gazetanıñ yazuınça, Yukos imperiasınıñ üzägenä höcüm , küpkenä investorlarnı şaqqtaırdı häm aksiälärneñ qimmäten yuğaltuına kiterde. Finans bazarı analizçılarınıñ fikerençä, iñ yaman senario çınnan da ğämälgä quyılsa , bu Russiäneñ xalıqara bazardağı abruyın töşeräçäk häm investorlarnıñ aqçaların alıp kitülärenä kiteräçäk. Yuganskneftegaz konfiskatsiälängän xäldä, bu xökümätneñ SSSR tarqalğannan soñ, ere xosusi milekne berençe märtäbä tartıp aluı bulaçaq. Tartıp alıp satu eşeneñ niçek bulaçağı xaqındağı mäğlümätlär qapma-qarşılılqlı. Qayberävlärneñ fikerençä, dävlät Kremldä previligiäsen yuğaltqan şäxestän xosusi milken üzqimmätenä tügel, ä arzanğa almaqçı. Şunnan soñ ul milek dävlätneñ energetika şirkätenä birelä ala, yaki politik taraftarına bazar bäyäsennän tübäneräkkä satıla ala. Bu farazlar döres bulıp çıqqan xäldä, monnan Yukosqa ğına tügel, ä Russiägä dä zur zian kiläçäk. Yukos aksiäläreneñ bäyäse 13 protsentqa töşte inde. Yukosqa ğına tügel, ä anıñ töp aksionerlarına da höcüm prezident Putin Kremeleneñ Russiäneñ iñ bay keşese Xodorkovskiynı tezländerü dip bäyälänä. Yuganskneftegaz Russiä nefte industriäseneñ iñ aldınğı sektorı bulıp xisaplana. Ul dönyada iñ küp nefte çığaruçı il Säğud Ğäräbstan belän yaqınça yarışırlıq xäldä. Yustitsiä ministerlege Yuganskneftegaznıñ ğına tügel, ä Samaraneftegaz häm Tomsknefteneñ dä aksiä häm xucalıq dokumentların konfiskatsiälägänen belderde. Qayber investitsiä bankaları Yuganskneftegaz şirkätenneñ qimmäte 12 belän 15 miliard dolar arasında dip belderälär. Dävlät anıñ bäyäsen 2000-nçe yılğı salım burıçı miqdarında yäğni 3 miliard 400 milion dolar tiräsendä dip xisaplarğa ciına digän xäbärlär yöri. Qayber belgeçlär xökümät Yuganskneftegaz şirkätenä qarata äytep kitelgän planın ğämälgä quyar dip ışanıp betmilär. Läkin, başqa berävlär Putin Yukosnıñ bankrotlıqqa töşüen telämim dip beldersä dä, dävlät Yukosnı bülgälärgä, tarqatırğa niätlänä digän fikerdälär.

Färit İdelle, Praga.
XS
SM
MD
LG