Accessibility links

шимбә, 10 декабрь 2016, Казан вакыты 10:09

Mostay Kärim Mintimer Şäymiev belän oçraştı


Şağir häm cämäğät eşleklese Qazanğa räsmi töstä tügel, ä xalıq şağire Rinat Xarisnıñ duslarça çaqıruı belän kilgän. Tatarstan Prezidentı belän dus bulğanlıqtan, Mostay Kärim, 21nçe yul könne Kreml’gä dä çaqırulı ide. Ber säğätkä yaqın däwam itkän oçraşudan soñ, şağir, jurnalistlar yanına çığıp, oçraşu, icadi plannar, dusları xaqında fikerläre belän urtaqlaştı. Mintimer Şäymiev häm Mostay Kärimneñ oçraşuına jurnalistlar kerä almadı, şuña, ölkän ädipkä birelgän berençe soraw - närsä xaqında söyläştegez, digän sorawdan ğiybärät ide. Niçek itep dus yäşärgä, urtaq äyberlär aşa ber berebezne yaratu xaqında fiker alıştıq, dide Mostay Kärim. Ul yaña ğına xalıq şağire isemenä layıq bulğan Rinat Xarisnıñ çaqıruı belän kilüen häm anı şuşı däräcägä ireşüe belän qotlarğa cıyınuı xaqında xäbär itte. «Tatarstan yäşläre» gäzite xäbärçese Flüra Nizamova klassiknıñ Rusiäne yaratuı xaqındağı şiğeren iskä alıp, xäzer fikeren üzgärtüe, yäki üzgärtmäwe xaqında soraw birde. Mostay Kärim, Rusiä - bezneñ watanıbız, anı haman da yaratam, dip cawap birde. Şiğerlär turında süz barğaç, icadi plannar turında da soraw birde jurnalistlar. Moña cawap qaytarğançı, Mostay Kärim, ä nindi äsärläremne uqığanığız bar, dip üze dä qızıqsındı. Soraw birgän keşe cawap qaytara almadı, ämma başqa xäbärçelär, klassiknıñ äsärlären belä bulıp çıqtı. Mostay Kärim üz çiratında, xäzerge waqıtta «Tormış mizgelläre» digän isem astındağı istäleklär kitabın yazuın xäbär itte. Başqortstan qunağı bulğanda, xäbärçelär Mostay Kärim tuğan Kläş awılı, anıñ Färidä Qudaşeva kebek ataqlı awıldaşları xaqında da süz alıp bardı. Ädipkä qaysı teldä icat itüe xaqında da soraw birelde. Ul, başqortça, dide. Mostay Kärimneñ Mintimer Şäymiev belän oçraşuında Rinat Xaris, ölkän ädipneñ qızı Älfiä xanım häm onığı Timerbulat äfände dä buldı. Qunaqlar, aldan iğlan itelgänçä, Qazannıñ ber restoranında, şağir Rinat Xarisnıñ mäclesendä bulaçaqlar. Annan soñ, Mostay Kärim tağın ber niçä kön Qazanda qalıp, Tatarstandağı icadi dusları belän oçraşırğa niätli.

Bikä Timerova

XS
SM
MD
LG