Accessibility links

якшәмбе, 11 декабрь 2016, Казан вакыты 03:17

Respublika kommunistları da Mäskäwdäge firkädäşlärennän qalışmıy


Tatarstan kommunistları da üzläreneñ Mäskäwdäge firkädäşläre kebek ük bülenü yulında yöri. Läkin Rusiäneñ Yustitsiä ministrlığı Kommunistlar firkäseneñ ike plenumınıñ qaysı legitim digän sorawğa äle avgust başında ğına cawap biräçäk. Ä menä respublikanıñ Yustitsiä ministrlığı uzğan şimbädä ütkän Tatarstan kommunistlarınıñ plenumın qanunsız dip bilgeläde. İsegezgä töşerep ütik, Rusiä kommunistlarınıñ 1-2 yül könne uzğan syezd häm al’ternativ plenumınnan soñ, 17 yüldä Qazanda respublika kommunistlarınıñ initsiativ törkeme dä plenum ütkärep, anda firkäneñ respublika bülegen citäkläwçe Aleksandr Saliynı urınınnan kiçekterelüe turında xäbär itte. Gennadiy Zyuganovqa qarşı çıqqan Vladimir Tixonovnı yaqlap çıqqan Saliy urınına Çallı şähär komitetı särkätibe Xafiz Mirğalimov saylandı. Läkin zyuganovçılar tarafınnan respublikada oyıştırılğan fetnä barıp çıqmadı. Tatarstan kommunistların haman da Aleksandr Saliy citäkli.

Sişämbe könne Tatarstan prezidentı Mintimer Şäymiev Yemen respublikasınıñ Rusiädäge wäkälätle wäkile belän oçraştı. Anda süz respublika neft’çeläre tarafınnan Yemendağı neft’ yatmaların ezläw eşlären alıp baru xaqında bardı. Şulay uq prezident İske yolalı Rus pravoslav çirkäweneñ mitropolitı belän oçraştı. Anda Qazannıñ meñyıllığına äzerlek waqıtında iske yolalı çirkäwlärne tözekländerü xaqında da äytelde. Bu eşkä 10 million sum aqça totılaçaq. Çärşämbe könne mitropolit Qazanda uzğan Qazan izge ana ikonası xörmätenä uzdırılğan Xac yörüendä qatnaştı. 25 yılğa ber genä uza torğan bu çarada berniçä meñ keşe qatnaştı. Alar Qazannıñ üzäk uramnarınnan uzdılar.

Gölnaz İlgizär

XS
SM
MD
LG