Accessibility links

якшәмбе, 11 декабрь 2016, Казан вакыты 09:15

Ğiraq kürşe illärdän ğamäli yardäm kötä


Ğiraqnıñ waqıtlı tışqı eşlär ministrı Hoşyar Zebari bügen Misırda kürşe illär wäkilläre belän oçraşıp Ğiraqqa yardäm turında söyläşülär uzdırdı. Oçraşular başlanğançı uq, Zebari jurnalistlar aldında, Ğiraqnı totrıqlandıru öçen yardäm "süzdä tügel, ä ğamäldä" kiräk, dip belderde: "Kürşelärebezdän – süzdä genä tügel, ä ğamäli yardäm kötäbez. Ğiraq xökümätenä – tınıç, totrıqlı, kürşelär belän dustanä mönäsäbättä bulaçaq ber il tözergä yardäm iter, dip ömetlänäbez, bez şunı sorarğa kildek," dide Hoşyar Zebari.

Ğiraq räsmiläre kürşedäge qayber illär çik buyında kiräkle çaralar kürmi, dip şikäyät belderde. Misır tışqı eşlär ministrı Ahmed Abdoul Ğeit, Ğiraqqa – ilne totrıqlandıru eşendä "bezneñ berdäm buluıbıznı kürü möhim" dide. Moña qadär bilgesez ber törkem, üzläre Al Qaidanıñ Yevropa qanatı dip atawçılar Bolğarstan belän Polşağa, ğaskärlären Ğiraqtan çığarmasalar – höcümnär belän yanadı. Bu turıda xäbärlär internetta çıqtı, ämma räsmi çığanaqlardan raslanmadı. Bolğarstan häm Polşa räsmiläre bu taläpne ütämiäçäklären belderde. Bügen ilneñ tönyağında kördlär yulbaşçısı Massud Barzani belän oçraşqan Ğiraq prezidentı Ğazi al-Yawar, federal Ğiraqta kördlärgä avtonomiä wağdä itte.

XS
SM
MD
LG