Fälestin Qanunçığaru Şurası, bügen Fälestin avtonomiäse citäkçese Yasser Arafatnı, Ahmäd Qorei'nıñ premyer-ministr wazifasınnan kitüenä qarşı kilmäskä çaqırğan rezolüsiä qabul itte. Qanunçığaru Şurası wäkilläre bügen, reformalar taläp itkän kierenke wazğiät turında söyläşü öçen cıyılğan ide. Sişämbe könne Berläşkän Millätlär Oyışması General Assamblyesınıñ İzraelne iminlek diwarın tözüne tutqtırğa çaqıruına qaramastan bügen İzrael tözeleşne däwam itäçägen belderde. Premyer-ministr Ariel Şaronnıñ kiñäşçese Dore Gold, İzraelneñ üz üzen yaqlarğa xoquqı bar, dide: "Fälestin höcümnärendä meñnän artıq İzraelle hälak bulğannan soñ häm 150gä yaqın intixar höcümennän soñ, İzraelneñ üzen saqlayaçaq iminlek divarın tözep beterergä xoquqı bar," dip belderde İzrael premyer-ministrınıñ kiñäşçese Dore Gold. Fälestin xezmät ministrı Ğassan al-Khatib, İzraelne Berläşkän Millätlär taläben qabul itergä çaqırdı: "Xalıqara cämäğätçelek xalıqara qanunnarğa qarap eş itä häm berlektä İzraelne dä xalıqara qanunnarnı ütärgä, fälestin cirendä, fälestinnär xisabına, xalıqnıñ köndälek tormışı häm iqtisadi xäle xisabına diwar tözüne tuqtatırğa çaqıra, " dide Fälestin xezmät ministrı al-Khatib. İzrael tışqı eşlär ministrlığı, 25 äğzalek Yevropa Berlegeneñ rezolüsiäne tulısınça xuplawı – "qızğanıç", dip belderde. Monnan soñ Berlekneñ Yaqın Könçığışta tınıçlıq saqlaw eşenä qatnaşa aluı şik tudıra, dielä belderüdä.
