Accessibility links

шимбә, 10 декабрь 2016, Казан вакыты 13:50

Narkotiklarğa qarşı köräş ayawsız bulaçaq<br><br>


Mäğlüm buluınça, 26 yün köne – narkomaníğa qarşı Xalıqara köräş köne bularaq bilgelände. Şuşı uñaydan Rusiä Federasísınıñ narkotík häm psixotrop matdälär äyläneşenä kontrollek itü buyınça Başqortstan idaräse başlığı Ämir Niğmätcanov «Başinform» mäğlümat agentlığında jurnalistlar öçen matbuğat oçraşuı ütkärde. Anda ul üze citäklägän idaräneñ bıyılğı yartı yıllıq eşçänlege yomğaqları belän tanıştırdı.

Matbuğat oçraşuında kiterelgän qayber sannar Başqortstanda narkomanínıñ kiñ taraluı häm narkotík matdälär belän alış – bireş itüneñ bik nıq artuı xaqında söyli. Ämir Niğmätcanov äytüençä, bügenge köndä Başqortstanda räsmi terkälgän narkomannar sanı altı- cide meñ tiräse. Läkin bu san çınlıqta 80 – 90 meñgä citä, dide ul. Alar arasında betep betkän narkomannar da, äle yaña ğına şuşı tayğaq yulğa kerä başlawçılar da bar. Ayıruça narkomannarnıñ yäşärä baruı borçuğa sala. 14 – 15 yäştäge äfyünçelär dä bar ikän xäzer. Ämir Nigmätcanov süzlärençä, Başqortstan narkotíklarnı qullanuçı töbäk kenä tügel, ä alarnı başqa töbäklärgä ütkärüçe tranzit republíkğa da äylände. Äfğanstannan uq kiteleüçe äfyünnär Tacikstan, Qazaqstan, Irımbur häm başqa töbäklär aşa Başqortstan cirenä kilep kerä häm inde Başqortstan aşa ütä alsa, il eçenä dä könbatışqa taba yulın däwam itä. Narkotík matdälär Başqortstanğa, nigezdä, automobil yulı belän kerä ikän.

Bıyılğı 5 ayda ğına da Başqortstanda narkotíklar belän bäyle 412 cinayät terkälgän, 366 cinayät eşe quzğatılğan. Şularnıñ 70 prosentı awır cinayätlär sanala. Bıyıl ğına da Başqortstanda 18 kilogramğa yaqın geroin, 21 kilogram mäk sabaqları, 16 kiloğa yaqın maríxuana, ike kilo yarım opiy tartıp alınğan.

Matbuğat oçraşuında äytelüençä, bügenge köndä Başqortstanda narkotíklarnıñ qanunsız äyläneşe belän bäyle yegermegä yaqın zur oyışqan cinayätçelek törkeme bar dip isäplänä. Kiläçäktä bu sannıñ da artuı bik ixtimal, dide narkotíklarğa qarşı köräş wedomstwosı başlığı. Kiläçäktä bu oyışma täcribä tuplí başlağaç, andí törkemnärne tabu häm cinayätçelärne mäxkämä aldına bastıru ciñelräk bulaçaq. Äle ber yıl ğına eşläwçe Narkopolísíneñ, älbättä, bu ölkädä eşçänlege tieşle däräcädä bulıp betä almí. 70 prosent xezmätkärlären elekke salım polísísı wäkilläre täşkil itkän bu oyışmağa äle täcribä tuplísı da tuplísı. Kem äytmeşli, bu oçraqta eş barışında öyränäçäklär inde.

XS
SM
MD
LG