Accessibility links

сишәмбе, 6 декабрь 2016, Казан вакыты 08:59

Tatarstanda Başqortstan tatarları könnären ütkärü turında söyläşülärgä kittelär


Tatarstannıñ Başqortstandağı Säwdä – iqtisadí wäkilçelege citäkçese, Başqortstan Tatar kongressı Başqarma qömitetı räise urınbasarı Ramil Bignov citäkçelegendäge ber törkem tatar milli oyışmaları wäkilläre 22 yül könne Qazanğa kitte. Älege törkemgä Tatarstanda Başqortstan tatarları könnären ütkärüne oyıştıru qömitetı äğzaları kerä. Uzğan programbızda qısqaça äytelgänçä, Qazanda Başqortstan wäkilläre Tatarstan xökümätendäge yuğarı citäkçelär häm Bötendönya Tatar kongressı Başqarma qömitetı wäkilläre belän oçraşular ütkäräçäk. Ul söyläşülärdä Tatarstanda ütäçäk Başqortstan tatarları könnäreneñ täğäyen könen bilgeläw häm bu bäyrämneñ programı buyınça fiker alışular kötelä.

Qazanğa yulğa çığar aldınnan, şuşı zur bäyrämne oyıştıru qömitetı äğzaları çärşämbe kiçendä Ufada çirattağı kiñäşmäsen ütkärde. Anı Tatarstannıñ Başqortstandağı Säwdä – iqtisadí wäkilçelege citäkçese Ramil Bignov açtı häm alıp bardı. Fiker alışular barışında Qazandağı könnärneñ isemen täğäyenlädelär. Ul aldan uq uylanılğança, Tatarstanda Başqortstan tatarları könnäre dip atalaçaq. Älbättä, monıñ şulay ataluına Başqortstan xakímítlarınıñ qatğí qarşı buluı mäğlüm. Bäğze räsmi çığanaqlardan alınğan xäbärlärgä kürä, Başqortstannıñ yuğarı citäkçelege bu bäyrämneñ ütkärelüenä bötenläy dä qarşı di. İnde ul ütkärelgän oçraqta da, fäqät Başqortstan tatarları könnäre genä bulırğa tieş tügel bu bäyräm, dip bara ikän republík türäläre. Ğomum Başqortstan mädäniäte, yäğni Başqortstan tatarları mädäniäte könnäre dip atalırğa tieş, digän fikerne alğa sörä ikän räsmi xakímítlar. Ämma Başqortstan tatar milli oyışmaları wäkilläre moña kisken qarşı. Çönki alay bulğanda, Qazandağı oçraşular, isemennän ük kürenüençä, mädäni yassılıqta ğına ütäçäk, ikençe törle itep äytkändä, ul tağın jırlap – biep, küñel açıp yörügä genä qaytıp qalaçaq. Ä Başqortstan tatar milli xäräkäte liderları Qazandağı oçraşularnıñ Başqortstandağı tatarlarnıñ problemnarı xaqında citdi söyläşülärgä nigezlänüen kötä. Qazan üzägendä başqort tirmäläre qorıp, taqmaqlar cırlap yörep kenä Başqortstandağı tatarlarnıñ problemnarın xäl itep bulmí. Utırışta qatnaşuçılar Başqortstan tatarlarınıñ könüzäk problemnarına Tatarstan citäkçelegeneñ iğtibarın nığraq yünältergä isäpli. Başqortstanda tatar telenä däwlät tele statusı taläp itüdä dä Qazan yağınnan teläktäşlek kötä Başqortstan tatar milli oyışmaları.

Ä älegä Tatarstannıñ räsmi türäläre Başqortstan Prezidentı xakímítı wäkilläre belän yarım – yäşeren söyläşülär alıp bara. Ul oçraşularda Başqortstan xakímítları Tatarstan wäkillären republíkta tatar problemnarınıñ yuq närsä ikänlegenä ışandırırğa tırışa ikän digän farazlar bar. Qazanda atnaqiç häm comğa ütäçäk oçraşularda Başqortstan tatar milli oyışmaları wäkilläre monıñ qorı farazlar ğına buluına, yä bulmasa bu süzlärneñ, kiresençä, döreslekkä turı kilüenä üzläre şahit bulırğa mömkin. Aldağı könnärdä moña tulı açıqlıq keräçäk.

XS
SM
MD
LG