Rusiäneñ pensiä fondı citäkçese Mixail Zurabov beldergänçä, Rusiä byudjetınıñ xäle , pensiälärne, 1 oktäberdän tügel, ä 1nçe avgusttan başlap kütärergä mömkinlek birä. Süz 6,3 % arttıru turında bara. Yäğni ğadi pensionerlar 130 sumğa, ä suğışta qatnaşqan veterannar 280 sumğa kübräk aqça alaçaq. Bezneñ xäbärçebez, uramğa çığıp, xalıqtan, pensiälär tiräsendäge xäl turında keçkenä soraştıru ütkärde.
Rusiä xakimiätläreneñ 1nçe avgusttan başlap, pensiälärne artırırğa cıyınuın, ölkän yäştäge keşelär işetkän, bulıp çıqtı. Ämma alar bu kütärelüne, l’gota, pensionerlar öçen taşlamalarnı beterü belän bäyli. Qazannıñ Çexov bazarında satuçı pensioner apalar, mäsälän, bu reformanıñ axırı xäyerle bulır, dip ışanıp betmi häm elekke tärtipneñ saqlanıp qaluın teli.Taşlamalarnı aqçağa alıştıru turındağı qanun, xalıq telennän töşmi. Ämma ul äle Rusiä Däwlät Dumasında ikençe uqılışnı da ütmägän. Şuña kürä, pensiälärneñ 1nçe avgusttağı artuı, älege qanun belän bäyle tügel. Bu ölkädäge reformanıñ näticäläre xaqında respublika citäkçeläre uylana. Çönki qanun qabul itelgän oçraqta, taşlamalarnı aqçağa äyländerü wazifası öleşçä respublika byudjetına yöklänäçäk.
«İnterfax» agentlığı xäbär itkänçä, Tatarstan Prezidentı Mintimer Şäymiev, «Veterannar turında»ğı qanunğa tözätmä kertep, minimal taşlamalar külämen bilgelärgä kiräk dip sanıy. Ägär tege,yäki bu töbäktä taşlamalarnı arttıru mömkinlege bulsa, ul anı eşli ala, çönki regionnarğa anıñ wazifa birelde. Respublika Prezidentı xäbär itkänçä, Tatarstanda, mäsälän balalar öçen sotsial açqalarnı, ğailäneñ keremenä qarap birelär ide. Ämma Rusiä häm Tatarstan qanunnarın täñgälläşterü waqıtında, bu tärtip beterelde, häm xäzer, respublika yañadan älege yulğa basarğa tora. Ğomumän alğanda, Tatarstan Prezidentı taşlamalarnı aqçağa äyländerü balançığın xuplıy häm bu eşne qotılğısız, dip sanıy.Bikä Timerova.
