Accessibility links

якшәмбе, 4 декабрь 2016, Казан вакыты 21:26

Qabulda 3 amerikan mäxkämä aldına bastı: alar äfğan suğışçıların cäberläwdä ğayeplänä


Amerikan xärbiläreneñ Ğiraq häm Äfğanstan totqınnarın cäberläw cäncalına bu könnärdä tağın ber ğadättäntış xäl östälde, xörmätle tıñlawçılar. Afğan ğısyançıların totıq itep aluda häm cäberläwdä, alarğa qarşı "üz suğışın" alıp baruda ğayeplängän 3 amerikan watandaşı kiçä Qabul mäxkämäse aldına bastı. Üzen şuşı törkemneñ yulbaşçısı itep tanıtqan Jonathan İdema, ğayepläwlärne kire qağıp, böten ğamällärgä AQŞ xökümätennän xuplaw buldı, dip belderde. Äfğanstanda Quşma Ştatlar citäkçelegendäge terorğa qarşı koalisiä köçläre başta İdema belän nindi dä bulsa bäyläneştä toruın kire qaqsa da, xäzer alarnıñ matbuğat wäkile – eye, İdema belän elemtä bar ide, dip belderä.

Çärşämbe könne uzğan matbuğat oçraşuında AQŞ Däwlät Departamentı wäkile Richar Boucher, Waşingtonnıñ İdema törkeme belän räsmi mönäsäbätläre yuq ide, dip tağın ber tapqır qabatladı: "Şunı açıqça äytergä telim – AQŞ häm bu keşelär arasında ber nindi dä bäyläneş yuq. Bez monı Äfğanstandağı ilçelektä dä belderdek" dide Boucher.

İdema keşeläre belän elemtädä buluların şulay uq Amerikan xärbiläre häm Äfğanstandağı NATO räsmiläre dä kire qaqtı. Ämma atna kiç könne Äfğanstandağı koalisiä köçläre wäkile major Jon Siepmann, amerikan törmäsendä 1 ay buyına ber äfğan keşese totıldı, häm anı xärbi köçlärgä İdema üze tapşırdı, dip xäbär itte. İdemanıñ xärbi köçlär belän xezmättäşlek itkännen Siepmann kire qaqtı, qulğa alınğan ul keşene Pentagon inde küptän ezli ide, ul potensial terrorçı ide, dide. Totqınnıñ iseme, qulğa alınu waqıtı häm säbäpläre, şulay anıñ xäzer qayda bulğanı turında Siepmann östämä ber ni dä äytmäde. Kiçä Qabulda mäxkämä utırışı tämamlanğaç jurnalistlar aldına çıqqan İdema, AQŞ saqlanu ministrlığı belän bez elemtädä tora idek, dip belderde: "Pentagon belän elemtädä tordıq, qaywaqıt könenä bişär tapqır, yuğarı däräcädä," dide ğayeplänüçe. Anıñ süzlärenä qarağanda Pentagon häm turıdan turı saqlanu ministrı Donald Rumsfeld häm anıñ yaqın yardämçeläre belän elemtä e-mail häm fax aşa barğan. Mäxkämädä ğayeplänüçelärgä qarşı berniçä äfğan keşese şaxitlek itte. Üzlären amerikan ğaskärläre itep tanıtqan İdema keşeläre älege äfğannarnı totıq itep alğan, ezärleklägän, törle cäberläwlär yulı belän başqa äfğan suğışçıları turında mäğlümat alırğa tırışqan. Şaxitlärneñ berse, taxi yortüçese Ahmäd Ali, amerikannar anıñ başın suğa tığuları, eçenä häm ayaqlarına qatı itep suğuları, şuşı cäzalar däwam itkän ber atna eçendä 2 genä kisäk ipi birüläre turında söyläp birde. Tağın ike şaxit – öslärenä qaynap torğan su qoyğanın söyläp birde. Alarnıñ berse, Guläm Sakhi: "3 amerikan östebezgä qaynar su sipte, häm terrorçılar buluda şiklänelgän keşelärneñ räsemnären kürsätep alar arasında qaysıların belgänebezne soradı. Berniçä tapqır cäberlädelär. Anda şulay uq ädğan tärcemäçeläre dä bar ide, alar qorallanğan ide. Alar da bezne qıynadı, östebezgä qaynap torğan su sipte häm cäberläde" dip söyläde mäxkämä utırışında şaxitlärneñ berse. Kiçäge utırışta ğayeplänüçe İdema üze çığış yasamadı. Utırıştan soñ jurnalistlar aldına çığıp ul – qulğa alınğan äfğan suğışçıları - Qabuldan tönyaqqa taba urnaşqan Bagram hawa bazasına höcüm oyıştırırğa äzerlängän bulğan häm Äfğan yulbaşçılarına höcümnär planlaştırğan, dip belderde. Qıynawlar häm cäberläwlär turında söylägän şaxit Sakhi''nıñ süzlären İdema kire qaqtı: "Prokuror qulında video tasma bar. Anda Ghulam Sakhi''dan soraw alu tulısınça yazılğan. 2 säğat yarımlıq tasma ul. Aña ber ni dä bulmadı, anı ber kem dä qıynamadı, ber ni dä bulmağan bu keşegä, tämammı?"

İdema, anıñ belän bergä eşlägän tağın 2 amerikan häm 3 äfğan keşesenä qarşı xökem eşen 3 xäkim alıp bara. Mäxkämäneñ çärşämbe utırışında, advokatlarğa – ğayeplänüçelärne yaqlaw eşenä äzerläner öçen kimendä 2 atna bireläçäk, dielde.
XS
SM
MD
LG