Üzeneñ kiläse prezident saylawlarında qatnaşaçağı xaqında bik soñğa qalmıy ğına iğlan itüe öçen Xämit Qarzay aldan planlaştırılğan Pakstan säfären dä kiçekterep torırğa buldı. Qabulda qalu räsmi töstä härxäldä şulay dip añlatıldı. Läkin kiçekterü artında Äfğanstannıñ yuğarı citäkçelegendä tuğan qatlawlıraq täräqqiat tora sıman. Başta, Qarzay üze belän bergä saylanaçaq ike vitse-prezidentnıñ berse itep saqlanu ministrı, taciq mäxälläseneñ kürenekle citäkçese Möxämmäd Fähimne alır dip farazlandı. Ämma ul oçraqta Fähim xäzerge urınınnan kitärgä tieş ide, ul üze isä monı bik telämäde dip xäbär itelde. Soñğı ike kön Qabulda kierenkelek tağın da arta töşte - Möxämmäd Fähim xökümätneñ prezident Qarzay belän şimbä könnärendä uza torğan kiñäşmäsenä kilmäde, anıñ urınına ul üzeneñ idarä başlığı belän bik ozaq oçraşu ütkärde. Fähim citäklägän Tönyaq Berektäşlektäge xärbi başlıqlar üzlärenä Qabulğa kilü häm äzer toru ämere birelüe xaqında belderde. Yäkşämbegä, ike citäkçe arasındağı şuşı qarşılıq azmı-küpme xäl itelde dip äytelsä dä, Qarzaynıñ Pakstan säfären kiçekterüe Qabuldağı wäzğiatneñ şaqtıy qatlawlı bulıp qaluına işarä itä. Düşämbe kiçen Xämit Qarzay räsmi töstä üzeneñ 9-nçe üktäbrgä bilgelängän saylawlarda qatnaşaçağın belderde. Anıñ belän bergä saylanaçaq ike vitse-prezident nämzäteneñ iseme dä mäğlüm buldı häm alar arasında Möxämmäd Fähim yuq. Şularnıñ berençese - Äxmät Zia Mäsüt, 2001-nçe yılda üterelgän Äxmät Şah Mäsütneñ enese, ikençese - Äfğanstan xäzäräläre yulbaşçısı Kärim Xälili. Yaña prezident bulu telägen ildä 20-läp keşe beldergän ide. Şular arasınnan iñ ömetlese bulıp Xämit Qarzay tora, älbättä. Qüwäte yağınnan aña küpmeder däräcädä barı tik tönyaqtağı üzbäklärneñ citäkçese general Räşit Dostum ğına köndäş bula ala. Ul Äfğanstan üzbäkläre tawışın qazanır dip kötelä. Nämzätlärne yaqlaw şulay itep milli tösmer alaçağına saylawlarda elekke ministr, şığıy möselmannar başlığı Xaci Möxämmäd Mohaqiqnıñ qatnaşuı da işarä itä. Paştunnardan soñ ilneñ ikençe zur milli törkeme bulğan taciqlardan, alar arasında populär Äxmätşah Mäsütneñ enesen üz yağına cälep itep Xämit Qarzay Äfğanstandağı milli berdämlekne saqlap qalırğa tırışa, läkin Äxmät Zia Mäsüt älegä qädär ilneñ Rusiädäge ilçese bulıp eşläp kilde, häm anıñ taciq mäxälläsenä yoğıntısı, üz qorallı köçläre bulğan Möxämmäd Fähimnän azraq. Fähim belän doşmanlaşıp Qarzay Äfğanstandağı ictimaği-säyäsi wäzğiatne tağın da totrıqsızlanıdra ala. Bigräk tä saylawlar aldınnan.
Kärim Kamal
Kärim Kamal