Şuşı könnärdä gäzit-jurnalalrğa yazılu kampaniäse tämamlandı. Äbünä näticälärenä qarağanda – tirajlar kimi, digän näticä çığarırğa mömkin. Tatarstan poçtası birgän mäğlümatlarına qarağanda, barlığı respublikada 2 million 20 meñ keşe gäzitlärgä yazılğan. Urtaça alıp isäplägändä, Tatarstanda gäzit-jurnalalr şundıy küp ki, här 2nçe Tatarstan keşesenä ayırım ber basma turı kilä. Gäzitlärneñ törläre küp bulsa da, küpçelekneñ tirajları oçnı-oçqa yalğarğa ğına citä. Häm bu tatarça gäzitlärgä genä tügel, citdi dip sanala torğan, häm milli basmadan kiñräk auditoriägä yünälgän urıs telle matbuğatqa da qağıla. Mäsälän, «Watanım Tatarstan» gäziten 2004 yılnıñ ikençe yartı yıllığında 21 430 keşe aldırsa, «Время и Деньги» kebek citdi basma – 10 meñ danä belän tarala. «Tatarstan yäşläre» gäziteneñ äbünäçelär sanı kimep barsa da, ul barıber äydäp baruçı basma bulıp qala, anı 56 meñ 413 meñ keşe ala. «Şähri Qazan» gäzitenä 3 meñ keşe yazılğan, läkin gäzit kiñ satuda tarala, şuña anıñ ğomumi tirajı 7 meñ tiräse, dip xäbär itte, gäzit xezmätkärläre. «Söyembikä» jurnalınıñ 15 600lek äbünäçese bar.
Tatar matbuğatı däwlät yärdämennän başqa yäşi almıy, ul tabışlı bula almıy, tatar gäzitläre başqalardan qalışa, dip yış qına baş möxärrirlärdän, gäzit uquçılardan işetergä turı kilä. Ämma, bu qalıpnı watuçılar da bar. İnde berniçä yıl rättän, media ölkäsenä kilgän eşmäkärlär küp köç sarıf itep, tatarça gäzitlärdän biznes-proekt yasarğa, anan tabış alırğa tırışa.Üz tırışlığı belän gäzit çığaruçı tatar eşmäkärläre, niçek tä gäzitne küpçelek xalıqqa añlayışlı häm qızıqlı itärgä tırışa, basmalar bazarında üz urını öçen köräşä. Mondıy säyäsät, berençelärdän bulıp, möstäqil räweştä eşli başlağan «Yuldaş» gäzitenä tatar matbuğatınıñ alğı sızığında qalırğa yärdäm itä. «Yuldaş» bu yartı yıllıqta urtaça 72-75 meñlek tiraj belän taralırğa plan qora. İnde ber niçä yıl çığıp kilgän «Aqçarlaq» gäziteneñ äbünäçelär sanı, 20 meñnän dä kim tügel.
Bikä Timerova.
