Accessibility links

пәнҗешәмбе, 8 декабрь 2016, Казан вакыты 03:14

Äfğanstanda prezidentlıqqa kötelmägän yaña kandidat wäzğiätne kiskenläşterä ala


Äle berniçä kön elek kenä Hamid Karzaynıñ Üktäber ayında Afğanistanda bulaçaq prezident saylaularında ciñep çığaçağına şik yuq ide. Ul öç yıldan birle il belän idarä itep kilde häm bu vaqıt eçendä çit illärdä dä , il eçendä dä yaqlau taptı. Läkin, Tönyaq Berektäşlekneñ täisrle ağzası Yunus Qanuninıñ kiçä soñğı minutta üz kandidatlığın quyuı belän vazğiät üzgärde.

Afğanistannıñ mäğarif ministere Yunus Qanuninıñ üz kandidatlığın quyuı ildäge politik säxnäne üzgärtte. Qanuni üz kandidatlığın Karzay saqlanu ministere Moxammed Faximnı visi-prezidentlıqqa täqdim itmägäç quydı. Qanuni dä Faxim dä tajiklar häm täsirle Pancir fraksiäseneñ ağzaları. Fahim Qanuninı yaqlayaçaq dip kötelä. Karzay Fahimnıñ kandidatlığın xalıqara basım säbäple quymadı. Xalıqaraq cämağätçelek Tönyaq Berektäşlekneñ täsirle komandirı Fahim ildäge qorallı törkemnärne qoralsızlandıruğa kirtä bulıp tora dip xisaplıy. Annan başqa Fahim prezident isemlegendä kandidat bulğan xäldä, saqlanu ministere häm visi-prezident postınan kitärgä tieş bulsa da, monı kire qaqqan. Afğanistan mäsäläse buyınça Pakistanda yäşävçe belgeç, jurnalist Ahmed Raşit Karzaynıñ bu adımın xuplıy.

Audio

"Bu cirle xärbi komandirlar çorınıñ ütüen kürsätä. Süz Karzaynıñ Fahimnı töşerep qaldıruında ğına tügel. Suğış komandirları irekle häm ğadel saylaularnı ütkärü öçen şart bulğan qoralsızlandırunı blokadalap kildelär. İnde xäzer BMOsı quşqança, qoralsızlandıru eşe bulaçaq dip ömet itärgä bula."

Karzay taciklarnıñ yaqlauın alır öçen üterelgän tanılğan tacik komandirı Ahmed Şax Masudnıñ enese Ahmed Zia Masudnı visi-prezident postı öçen üz isemlegenä kertte. Aralarında Üzbäk komandirı Raşid Dostum da bulğan 20 kandidat arasında Karzaynıñ saylanu mömkinlege zur dip xisaplana. Qanuni täsirle saylaualdı kampaniä alıp bara alırmı-yuqmı, monısı äle bilgesez. Jurnalist Ahmed Raşitnıñ süzlärençä, Qanuninıñ taciklarnıñ häm Könyaqtağı afgannarnıñ ber öleşen üz safına cälep itüe mömkin. Läkin, Karzay isemlegendä Şax Masud eneseneñ iseme bar häm bu anıñ pozitsiäsen nığıta.

Audio

"Qanuni Fahim häm taraftarlarınıñ yaqlauın alala. Läkin, Fahim açıqtan açıq Karzayğa qarşı çığa almıy, Çönki anıñ isemlegendä tanılğan Masud ğailäsennän Ahmed Zia Masud bar. Tönyaq Berektäşlektäge kandidatlarnıñ berse dä anı yaki Karzaynı açıqça ğäyepli almıy."

Şax Masudnıñ başqa ber enese Qanuninı yaqlıy dip tä belderelä. İsemeneñ äytelüen telämägän BMOınıñ ölkän ber räsmise Qanuni qatnaşqannan soñ yarış qızu bulaçaq , läkin, Karzay ciñep çığaçaq digän fiker belderde. Räsmi şäxesne saylaular tügel, ä annan soñ ni bilaçaq digän sorau küberäk borçıy. Çönki Fahimnıñ saylaulardan soñ da qoralları häm bülekläre bulaçaq. Kabulda yäşävçelärgä kilgändä, alar yaña bäxäs kierenkelekne üsteräçäk dip borçılalar. Qayberävlär Azatlıq xäbärçesenä bolay dip beldergännär. Qazeta satuçı Qader bolay digän

Audio

"Alar yäğni Karzay belän Fahim bergäläp eşläsälär ide bu xalıqnıñ mänfäğäte öçen bulır ide. Xalıq alarnıñ bergä eşläve belän kileşer ide. Läkin, alar bergä eşlärgä telämilär bulsa kiräk."

Mazar-ı-Şäriftän yäş üzbäk militsiänorı Cumah Murad bolay digän

Audio

"Alar xezmättäşlek itmäsälär naçar bulaçaq. İnşallah xezmättäşlek itärlär."

Cämağätçelek xakimiät öçen köräş ildä bolay da nıq bulmağan totrıqlıqnı qaqşatır häm kierenkelekne üsterer dip borçıla.

Färit İdelle, Praga.
XS
SM
MD
LG