Accessibility links

якшәмбе, 4 декабрь 2016, Казан вакыты 06:51

Qazanda tawıq ite belän 30 keşe ağulanğan, şularnıñ 7 balalar.


Qazanda uzğan yal häm atnanıñ berençe könnärendä ıslanğan tawıq ite belän barlığı 30 keşe ağulanğan. Şularnıñ cidese baliğ bulmağan balalar. Monıñ xaqında Ministrlar kabinetınıñ sişämbe brifingında iğlan itelde. Qazan xastaxanälärendä äle 17 keşe yata. İke balanıñ xäle urtaça awır dip bäyälänä. 10 keşe sişämbe könne däwalanıp öylärenä qaytarılırlar dip farazlana. Tawıq ite aşap ağulanğan ber ir keşe, inde xäbär itüebezçä, ülde. Mäğlüm ki ağulı it citeşterüçe tabıldı. Ul eşmäkär kön'yakta yal itä bulıp çıqtı. Xuca yuğında yallanıp eşläwçelär tawıq ıslağanda texnologiäne häm sanitar normalarnı bozğannar. İtneñ tışqı qiäfäten yaxşırtu öçen qullanıla torğan nitrit nutriä digän ximik toznı başta äytelgänçä 3 tapqır tügel, ä 300 tapqır arttırıp salğannar. İnde xoquq saqlaw oyışmaları cinayät eşe quzğatqannar, 3 keşe qulğa alınğan. Brifingta, Qazan administratsiäse, sıyfatsız ıslanğan tawıq ite belän ağulanu oçrağı buyınça, sanksiäsez säwdä oyıştırılğan urınnarnı beterü turında qarar çığardı dip belderelde. Respublika sanitar epidemiologiä küzätüe Ministrlar kabinetına tiz bozıla torğan produktsiä citeşterä torğan qayber eşmäkärlek törlären çikläw turında çikläw turında möräcäğät itäçägen belderde. Yunıs Ätnäle.

XS
SM
MD
LG