Accessibility links

Кайнар хәбәр

Makedoniä slavannarı ildäge albannarğa kiñräk xoquqlar birügä qarşı çığa


Üzendä şaqtıy ğına alban yäşägän Makedoniädä ictimaği-säyäsi wäzğiat yänä kierenkelänü yağında. Bu atna anda meñlägän keşeneñ başqaladağı parlament binası qarşında cıyılıp, ilneñ alban töbäklärenä kiñräk möstäqillek birüne küzdä totqan qanunğa qarşı cıyın ütkärüe belän başlandı. Yevropa Berlege yardämendä äzerlängän şuşı qanun Makedoniäneñ eçke büleneşen milli çiklärgä qarap üzgärtä, ämma ildäge slavannar moña kisken qarşı. Alar, üzgäreşlär ilneñ tarqaluına kiterä ala dip şürli.

Qanunda täqdim itelgän administrativ çaralar ildäge munitsipal'' bülgelär sanın 123-tän 80-gä qaldırıp, slavan makedonnar östenlek itkän qayber töbäklärne nigezdä albannar yäşägän rayonnarğa quşa, häm bu albannarğa cirle däräcädä kiñräk wäkillek birä ala. Moñardan tış başqala Skopje iketelle şähärgä äylänä, uram isemnäre häm räsmi qäğäzlär anda makedon wä alban tellärendä yazılırğa tieş bulaçaq. İlneñ xäzerge xökümäte, mondıy çaralar Makedoniädäge demokratiä häm totrıqlılıqnı saqlap qalu öçen zarur dip belderä. Mäğlüm ki, andağı xalıqnıñ kimendä çiregen albannar täşkil itä. Läkin makedon slavannarı arasında başqa fiker dä bar - alar, xökümätneñ şuşı plannarı ilne federatsiägä äyländerep, kiläçäktä anıñ tarqaluına kiterä ala dip qurqa. Düşämbe könne şuşı fikerdä toruçılar başqala Skopjeda uram cıyınına çıqtı, anda 10 meñnän artıq keşe qatnaştı dip xäbär itelde.

Audio

Cıyında qatnaşuçılar yaña çaralar täqdim itkän xökümät citäkçelären ilne bülgäläwdä häm satuda ğäepli. Alar fikerençä, xakimiat xalıq fikeren bötenläy isäpkä almıy häm üz plannarın parlament aşa şıpırt qına ütkärergä teli. Oppozitsiädäge partiälärneñ citäkçelärennän berse Nikola Gruevski cıyında qatnaşuçılarnı, Makedoniäne bülgäläw tırışlıqlarına yuq dip äytergä öndi.

Audio, Nikola Gruevski

"Alar, yäğni xökümättägelär, xalıq belän uyınnar uynamasqa tieş. Bez bügen biregä xökümät ğämälgä quyarğa tırışqan territorial'' büleneşkä yuq dip äytergä cıyıldıq" di Nikola Gruevski. İldä albannar yäşägän rayonnarnı ereländerü planın Makedoniäneñ liberal partiäse äğzası Stojan Andov ta tänqitli häm ...

Audio, Stojan Andov

"Mondıy eşlär parlament tarafınnan xäl itelä almıy, bu barı tik xalıq tarafınnan ğına eşlänä" dip belderä. Oppozitsiä xäzer şuşı mäs''äläne xäl itü öçen referendum ütkärüne alğa sörä häm bu eşne başlap cibärü öçen kiräk bulğan 150 meñ imzanıñ yaqınça 100 meñe inde tuplandı di. Londonda urnaşqan Suğış häm Solıx çorı xäbärläwe İnstitutınıñ xezmätkäre Ana Petruçeva, xökümät uram cıyınında yañğırağan taläplärgä birelmäs kebek, ämma ildä bu mäs''älädä referendum ütkärü niäte belän çığu wäzğiatne üzgärtä häm bu yänä totrıqsızlıqqa kiteräçäk dip belderä.

Audio, Ana Petruçeva

"Ägär dä oppozitsiä imzalarnı kiräkle sanda cıya ikän, xökümät monı inkär itä almayaçaq häm referendum ütkärergä tieş bulaçaq, bu isä östämä şik wä milli kierenkelek tudıraçaq" di Londondağı belgeç. Petruşeva süzlärenä qarağanda, makedonnar referendum ütkärgän oçraqta, näq şunı uq üzläre yäşägän töbäklärdä albannar da oyıştıraçaq häm bu yaña nizaqqa ğına kiterä ala. Skopjedağı cıyın älegä tınıç qına ütsä dä, ilneñ qayber töbäklärendä inde politsiä belän bäreleşlär dä bulıp aldı.

Kärim Kamal
XS
SM
MD
LG