Accessibility links

якшәмбе, 4 декабрь 2016, Казан вакыты 02:56

“Simbirskiy kur''yer” gäzitendä Bolğar sivilizatsiäse turında zur yazma basıldı


Ölkä başlığı Vladimir Şamanov berençe märtäbä ölkä buyınça 1 mln tonna uñış cıyıp alu burıçın quyğan ide. Mondıy uñış küläme kürşe Tatarstandağı ğadäti uñışnıñ 20 protsentın ğına täşkil itsä dä, bulaçaq uñış turında ğorurlıq xisläre dä sizelä. Mäsälän, ölkä başlığı İske Qulatqı rayonındağı çığışında: “Alda bezne zur uñış kötä – million tonna aşlıq cıyaçaqbız” – dip belderde. Tik “Alla boyırsa” digäne dä kiräk bulğandır, çönki hawa xälläre xäweflänerlek. Yañğırlar “Vstat', smirno!” komandasın añlamasqa da mömkin. Äle peçän cıyu bik qıyın bara. Şul uq yañğırlar arqasında börtekle aşlıqlarda qoñğırt tutıq ürçi. Belgeçlär äytüençä, mondıy xafa uñışnıñ yartısın yuk itä ala. “Simbirskiy kur'yer” gäziteneñ ber yazması “Yaña urıslar borınğı bolğarlar sere belän faydalana” digän anons (alxäbär) belän birelgän. Yazmadan ber özek kiteräbez: “Bolğarlar dönyada tiñsez yozaqlar yasağannar. Bügenge “medvejatniklar” da alarnı açu ısulların belmilär. Sember timerçeläre alarnıñ seren açqannar, häm yaña urıslar çiratqa basıp yozaqlar sorıylar”. Tul ber säxifäne bilägän yazma “Borınğı sivilizatsiägä 128 çaqrım ğına” dip atala. Kereş süze ğibrätle: Pasxi utrawı, ink, atstek kul'turaları qarap aptırıysı yuk – yänäşäbezdä genä şundıy böek kul'tura bulğan. Häm sanap ütelä. Yevropa yuınunıñ närsä ikänen belmägän waqıtta Bolğarda munçalar, suütkärgeçlärn bulğan. Çirkäw astında sıqrap yatqan qaber taşları. Binalarnıñ iskitkeç akustikası arqasında namaz uqunıñ yıraqlarda işetelüe. Mavzoleylarnı monastır' bazı itep qullanu kebek qıñğır ğamällär... Şähri Bolğarğa säyäxät qılğannar öçen monda yañalıq yuk inde. Yañalığı şul: kürşelärebez öçen alar telendä moña qadär äytelmägän süz äytü.

XS
SM
MD
LG