Accessibility links

дүшәмбе, 5 декабрь 2016, Казан вакыты 15:29

Qazanda häykällär citärlekme?


Respublikada Qazannıñ meñyıllığına äzerlek däwam itä. Anıñ qısalarında şähärne maturlatu, yullarnı tözekländerü kebek eşlär genä eşlänmi. Bäyräm uñayınnan başqalanı törle häykällär belän bizäw täqdimnäre dä yañğırıy. Qazannıñ olı yubileyına şähärdä berniçä häykäl quyarğa cıyınular turında süzlär inde küptän yöri. Qazannı saluğa meñ yıl tulu uñayınnan häykäl buldıru eşläre däwam itä. Xäzerge köndä iñ yaxşı proyektqa bäyge bara. Ul yül urtalarında tämamlanırğa da tieş ide. Läkin, ällä äybät proyektlar bulmağanğa, ällä başqa säbäplärdän, bäyge oktäber ayına qädär ozınaytıldı. Sankt-Peterburg şähäre tarafınnan başqalabızğa Petr I häykäle büläk iteläçäge xaqında da süzlär buldı. Läkin qayberäwlär älege sınnar belän genä çiklänergä telämilär. Şuşı könnärdä genä Tatar-inform agentlığı xäbär itüençä, ğalimnär, eşmäkärlärdän torğan ber törkem Qazanda ğäräp-izrail suğışı faciğäsenä bağışlanğan häykäl proyektına bäyge iğlan itte. Ul da şähärneñ meñyıllığın bäyräm itkän könnärdä quyılırğa tieş. Älege bäygegä kilgän eşlärne qarawçı komissiä dä tözelgän. Häykälne buldıru belän Qazanda eş itüçe Ekonomiçeskiy prorıv – İqtisadi urğılış iqtiasadi-säyäsi oyışması şöğellänä. İzrail’dän dä, Fälestinnän dä şaqtıy yıraqta urnaşqan Qazanda bu ideyä qaydan tuğan soñ. Bu xaqta İqtisadi urğılış oyışmasınıñ räise Kamil Zartdinov menä närsälär äytte.

Bez älege häykälne ğäräp-izrail konfliktında qatnaşqan ike böyek xalıqqa teläktäşlek yözennän quyarğa telibez. Qazannıñ meñyıllığı citä, anda törle illärdän küpsanlı qunaqlar kiläçäk. Kilüçelär barısı da respublikada dus, tatu yäşäwçe tatar häm rus xalıqlarınıñ bu xalıqlarğa izge teläklärdä genä buluın kürergä tieş

Kamil äfände süzlärenä qarağanda, bäygedä qatnaşır öçen inde 4 ğariza da birelgän ikän. Ciñüçelärne isä şuşı uq oyışma wäkilläre biräçäk aqçalata büläk kötä. Berençe urınnı yawlawçığa 1 meñ dollar, ä ikençe, öçençe urınnar öçen 500 dollar külämendä priz tapşırılaçaq. Häykälneñ üzen yasarğa aqça älegä yuq, läkin bäygene oyıştıruçılar anı finanslaw belän dä problem bulmas, kiräkle aqçanı bez üzebez tababız, barı tik bik äybät, ber kürüdä istä qalırlıq häykäl proyektı bulsın ğına, dip ışandıra.

Gölnaz İlgizär

XS
SM
MD
LG