Accessibility links

чәршәмбе, 7 декабрь 2016, Казан вакыты 17:34

Tatnet: Tatarstanda internetnı qullanuçılar sanı 80% artqan


Tatarstanda internetnı qullanuçılar, ütkän yıl belän çağıştırğanda, 80 % artqan häm xäzer 135,4 meñ keşene täşkil itä. Ä internetta yörü, säxifälärgä kerü, mäğlümatlarnı küçerep alu, çeltärdä xäräkät itü küläme 2 tapqırğa diärlek zurayğan. Bu sannarnı, comğa könne, Elemtä ministrlığı iğlan itte. Respublikanıñ fänni-mäğärif çeltären üsterü programması qısalarında, 28 mäktäp häm gimnaziä, 12 rayon mäğärif bülege İnternetqa totaşa alğan. Elemtäçelärneñ mäğlümatlarına qarağanda, Tatarstanda, internet klub, poçta bülekläre belän, başqa ölkälärgä qarağanda kübräk keşe qullana. Belgänegezçä, qayber poçta büleklärendä internetqa totaştırılğan kompyuterlar tora. Ministrlıq mäğlümatlarına qarağanda andıy urınnarnıñ sanı 74 kä citkän. Alarnıñ yartısı diärlek, awıl häm rayon poçta bülekçälärendä urnaştırılğan. Poçta, İnternet klublarğa ayına 17 meñläp keşe kilep kitä ikän häm awıllarda, global çeltärgä totaşu urınnarı, şähärgä qarağanda kübräk keşene cälep itä, dip xäbär itä Tatarstan elemtä ministrlığı.

İqtisat ministrlığı uz çiratında, byudjet oyışmaların internetqa totaştıru turında uylana. Bu atnada anda informatizatsiä häm elemtä mäs’älälären bağuçı ictimaği şura utırışı bulıp uzdı. Älege ictimaği şura, «kompyuter telekommunkasiäläre çeltären tözü turında»ğı xökümät qararın xuplap çıqtı. Süz kompyuterlarnı häm telefonnarı bulğan däwlät oyışmaların internetqa yalğaw turında bara. Şulay uq, dönya külämendäge tügel, ä şähär, respublikanı eşenä alğan eçke çeltärne qoru turında da süz bara. Bu oçraqta, xakimiät oyışmaları arasında mäğlümat almaşu tizlege bermä-ber artırğa tieş, bu üz çiratında çittän torıp idärä itüne dä ciñeläytäçäk. Çeltär qoru belän «Tattelecom» şirkäte şöğellänä. Elegräk iğlan itelgänçä, bu yünäleştäge eş inde başlanıp kitkän. Läkin, böten däwlät oyışmaların ber çeltärgä totaştırıp beterü waqıtı - bilgele tügel.

Tatnet yañalığı: şuşı könnärdä internet çeltärendä yaña sayt barlıqqa kilde. duslar.narod.ru säxifäse – bäysez tatar portalı digän isem belän açılıp kitä. Saytnı yasağan keşelär bilgesez, ber internet şirkätneñ adresı ğına kürsätelgän. Biredä studentlar tormışında bulğan qızıqlı waqiğalar , mäzäk tä, ayanıç ta xikäyälär tuplanğan, köndälektän özeklär belän dä tanışıp bula. Sayt här kemgä üz qissaların cibärergä häm şuşında urnaştırırğa täqdim itä. Şulay uq, duslar.narod.ru portalında urın alıp, şuşı adresta elektron räsemnär al’bomın yasarğa täqdim itelä. Monda şulay uq, mp3 formatında cırlar cıyılğan. Alar arasında tatar estrada yoldızlarınıñ cırları da, zamança janrda eşläwçe kompozitor, Dj-larnıñ äsärläre dä urnaştırılğan. Duslar.narod.ru säxifäse şulay uq, tatar tarixı, ğöref-ğädätläre, tuy yolaları, tatar tele turında qısıqçağa mäğlümat birä. Anda tatar tele törki xalıqlarnıñ qıpçaq törkemenä kerä, dip äytelsä dä, säxifädä şuşı borınğı törki teldän berär süz oçratu awır. Ezli torğaç, portalda ber niçä tatar süzen taptıq, başta «räxim itegez» dielgän, säxifä isemendä dä «duslar» digän süz bar, şunıñ belän bergä tatar cırları isemendä tatar atamaları oçrıy, başqa - yuq. Üzegez kerep bağarğa teläsegez, saytka duslar.narod.ru adresın cıyıp kerä alasız.

Bikä Timerova.

XS
SM
MD
LG