Accessibility links

сишәмбе, 6 декабрь 2016, Казан вакыты 08:48

Ğiraq räsmiläre Däwlät Şurasın saylıyaçaq mäclesne kiçekterde


Ğiraq räsmiläre bu atna axırına bilgelängän däwlät şurasın saylarğa tieşle ilküläm konferensiä – mäclesne 2 atnadağa kiçekterde. Bu cıyın xäzer avgust urtasında ütäçäk. Kiçekterüneñ räsmi säbäbe cıyınğa kübräk qatnaşuçı cälep itü öçen dip añlatılsa da, küzätüçelär fikerençä, oyıştıruçılar mäclesne iminlekneñ naçar buluın isäpkä alıp kiçektergän bulırğa mömkin.

Şuşı mäcles bu atna axırında cıyılıp 100 wäkildän torğan waqıtlı Ğiraq Däwlät Şurasın saylaw eşen başlap cibärergä tieş ide. Mäclesneñ töp oyıştıruçısı häm räise Fuat Mässüm mäcles BMO sorawı belän, anda kübräk ğiraqlılar qatnaşa alsın öçen kiçekterelä dide.

AUDİO: BMO bezdän mäclesne ike atnağa kiçekterüne soradı. Ğiraq cämäğätçelegeneñ törle öleşläre belän söyläşülärne däwam itü häm mäclestä qaralaçaq mäs''älälär turında söyläşü öçen.

Ämma küzätüçelär ildä iminlekneñ citmäwen dä iskä ala. Çärşämbe könne genä maşinağa quyılğan ber bomba şartlawdan 70-läp keşe hälak buldı. Bu iyün axırında amerikannar ğiraqqa suverenitetnı qaytarğannan soñ bulğan iñ zur höcüm.

Mäclestä ber meñläp wäkil saylap Quyaçaq Däwlät Şurası ğinwar ayında ütäçäk saylawlarğa qädär küçeş çorı xökümäteneñ eşen küzätep barırğa tieş.

Küzätüçelär äytüençä, mäclesne oyıştıruçılar ildäge, AQŞ okkupatsiäsenä qarşı çığuçı iñ zur törkemnärneñ anda qantaşuına ireşä almağan. Tä''sirle sönni oyışma Möselman Ğölämälär Berläşmäse çaqırunı kire qaqqan. Tağın ber Sönni oyışma Ğiraq İslam Partiäse anda bötenese aldan oyıştırılğan dip mäclestä qatnaşmasqa buldı. Ğiraqnıñ könyaq öleşendä koalitsiä köçlärenä qarşı kiñküläm ğiysan kütärgän şiğilar citäkçese Muqtada äs-Sadr da anda üz wäkillären cibärüdän baş tarttı.

Pänceşämbe könne Söğüd Ğärabstanında çığış yasap AQŞ däwlät sekretare Colin Powell mäclesne kiçekterü yaxşı bulğan dide.

AUDİO: Bez bu turıda Ğiraq küçeş xökümäte räsmiläre häm BMO belän inde berniçä kön buyı söyläşäbez. Häm soñğı berniçä köndä mäclesne aşığıp üktärügä qarağanda yaxşı itep ütkärü öçen anı kiçekterü yaxşıraq bulıp kürenä başladı. Häm min ul şulay ütär dip ışanam.

Räsmilär kiçekterüdä iminlek mäs''äläläre zur rol'' uynamıy dip kürsätergä tırışsa da, analitiklar iminlek citmäwe töp säbäplärneñ berse dip isäpli. Londondağı Patşa Berläşläterelgän Xezmätläre İnstitutınıñ älege töbäk belgeçe Mostafa Alani söyli.

AUDİO: Yaxşı mäğlüm urında küpsanlı keşelär 3 köngä cıyılıçaq. Bu urın intixar terrorçı, granataatqıç yäki raketa höcüme öçen bik uñay hädäf. Minemçä töp säbäp şul. İminlekkä ışanıç bulmıy torıp bu cıyın tiz genä ütmäs dip uylıym.

Anıñ fikerençä, iminlekne nığıtu öçen 2 atna ğına citmiäçäk.

AUDİO: Minemçä, ägär säbäp şul ikän, iminlekne nığıtu öçen 2 atna ğına citmiäçäk. Ägär dä kiçekterüneñ säbäbe qantaşmawçılarnı da anda qatnaşırğa ügetläw ikän, alar barıber qıyınlıqlarğa yulığaçaq dip uylıym. Şuña kürä kiçekterülär berniçä märtäbä bulırğa mömkin.

Alani äytüençä, niçek kenä bulmasın, bu ildäge demokratik protsesnı totqarlıyaçaq.

AUDİO: Älbättä bu çigeneş. Ämma iminlek mäs''äläläre demokratiädän östenräk quyılırğa tieş. Xalıq xoquqlar, demokratik xoquqlar sorağanğa qädär äle imin tirälektä yäşärgä teli.

Naif Aqmal, Praga.
XS
SM
MD
LG