Accessibility links

сишәмбе, 6 декабрь 2016, Казан вакыты 08:51

Dönya säwdä oyışması üsep kilüçe illärneñ iqtisadına, bigräk tä andağı fermerlarğa nıq tä''sir itärlek, tarixi kileşügä ireşte


Dönya säwdä oyışmasına kergän illär üsep kilüçe illärneñ iqtisadına, bigräk tä andağı fermerlarğa nıq tä''sir itärlek, tarixi kileşü dip bäyälängän kileşügä ireşte. Uzğan tön buyı däwam itkän kierenke söyläşülärdän soñ Dönya Säwdä Oyışmasındağı 147 äğza il ber yıl çaması elek uñışsız tämamlanğan dönya säwdäne irekländerü söyläşüläreneñ qısaları turında kileşte. Bu kileşü yarlı illär öçen uñış dip bäyälänä. AQŞ, Yewropa Berlege, Yaponiä, Braziliä häm başqa illär fermerlarğa subsidiälärne kimetü turında kileşte. Bu üsep kilüçe illärdäge fermerlarnıñ konkurensiä mömkinleklären arttıraçaq. Çönki älegä bay illärneñ fermerları subsidiälärdän nıq fayda kürep kilä. Moña almaşqa bay illär üzläreneñ sänäğät tawarların yarlı illärdä satu öçen yaxşıraq şartlar alaçaq. Dönya säwdä oyışmasınıñ baş mödire Supaçai Paniçpakdi xäbärçelärgä bolay dip äytte:

AUDİO: Min bu hiçşiksez tarixi mizgel dip uylıym. Bu çınnan da älege oyışma öçen tarixi mizgel. Çönki bez tağın ber märtäbä ber uy ber fiker belän härtörle kirtälärne ütä aluıbıznı rasladıq.

AQŞ säwdä wäkile Robert Zoellick häm Yewropa Berlege säwdä wäkile Pascal Lamy bu kileşüne dönyaküläm säwdä öçen dä, üsep kilüçe illär öçen dä faydalı kileşü dip bäyäläde. Ämma bu kileşü Yewropa Berlegendä qarşılıqlarğa oçrarğa da mömkin. Çönki Berlektän iñ küp fermer subsidiäläre aluçı il Fransiä fermer subsidiälären beterügä nıq qarşı çığa. Dönya säwdä oyışması söyläşülärendä Afrika illären wäkillek itüçe Mavrikiy wäkile 90 yarlı il törkeme telägänneñ barısına da ireşmäde, ämma bez bu kileşüne qabul itäbez dide. Könbatış Afrika illäre başta mamıq säwdäsen ayırım qarawnı taläp itä ide, xäzer alar ul taläplären kire aldı. Qıtay wäkile kileşüne xuplasa da, ul üsep kilüçe illärneñ ömetlären aqlamıy dide. Bu kileşü kiläçäktä ayırım mäs''älälär täfsilläbräk qaralaçaq kiñräk söyläşülärneñ nigeze bulıp toraçaq. Dönya Bankı äytüençä, ul kileşü säwdäne arttıru häm dönya iqtisadına milliardlarça dollar kiterep üseş tä''min itü aşa 500 millionlap keşegä yarlılıqtan çığu mömkinlege birä ala. Dönya säwdä oyışması baş mödire, bügenge kileşüne xuplasa da äle anı sintäberdä Dohada yañartılaçaq söyläşülärdä uñışlı itep tämamlarğa kiräk bulaçaq dide.

AUDİO: Bügen küptaraflılıq şiksez keçkenä ciñügä ireşte. Min monı keçkenä ciñü dip atıym, çönki kiläçäktä ütäçäk Doha söyläşülärendä uñışlı tämamlaw zur ciñü bulaçaq .

Doha söyläşülärendä sänäğät tawarlarına, ba illärdän kertelüçe sement, ayaq kiemnäre, ximiä äyberläre, maşinalar kebek tawarlarğa import poşlinaları turında kileşergä kiräk bulaçaq.
XS
SM
MD
LG