“İnterfax” agentlığı xäbär itüençä, Tatarstan prezidentı xezmät häm tıl veterannarğa qağılğan taşlamalar mäs’äläse töbäklärdä xäl itelergä tieş dip belderde. Taşlamalarnı beterep, tüläwlär belän alıştıru turındağı qanun proyektı cämäğätçelektä zur rezonans uyattı. İñ möhime, taşlamadan qullanuçı veterannarnıñ tormış däräcäse kimemäskä tieş, dip beldergän Tatarstan prezidentı. Ul taşlamalar mäs’äläsen “Berdäm Rusiä” firqäse alıp barğan säyäsät belän bäyläp, üz qaraşların da belderä.
Xalıqara söyläşülär
Premyer-ministr Röstäm Miñnexanov İran Respublikasına barıp, iqtisadıy, texnik, fänni xezmättäşlek turında söyläşte. Ä düşämbe könne Kuveyt däwläteneñ wäqıflar häm din eşläre ministrı Abdulla Maatuq al'-Maatuq citäkçelegendäge delegatsiä Ministrlar Kabinetında qabul itelde. Süz Tatarstanda din eşlärenä häm millätara totrıqlıqqa iğtibar häm ike arada xezmättäşlek turında bardı. Qunaq, şulay uq, İslam universitetında, Qazan yärminkäsendä buldı.
Qazannıñ iñ borınğı Märcäni mäçetendä remont eşläre bara. Märcäni mäçetenä yaña manara häm ay quyıldı.
Tatarstannıñ mäğärif ministrı alışındı
Düşämbe könne Tatarstannıñ mäğärif ministrı Fariz Xarisov başqa eşkä küçü säbäple, wazifalarınnan azat itelde. Fariz Faxraz ulı Xarisov mäğärif ministrı bulıp 7 yıl däwamında eşläde. Aña qädär ul Qazan gimnaziäläreneñ bersendä direktor bulıp, yaxşı näticälärgä ireşte, annarı Aviatözeleş rayonınıñ mäğärif bülegen citäkläde. Xäzer mäğärif sistemasında fän, innovatsiälär belän bäyle yaña üzgäreşlär başlanırğa tora. Bu şartlarda Tatarstan prezidentı respublikanıñ mäğärif häm Fän sistemasın yaña keşegä, iqtisat fännäre doktorı Räis Şäyxlislamovqa tapşırulı turında ukaznı imzaladı. Räis Şäyxlislamovqa 52 yäş, ul Tatarstannıñ Möslim rayonında tuıp üskän, berniçä yıl Çallı şähär mäğärif idäräsen citäklägän. Ä soñğı yıllarda Qazan universitetınıñ Çallı filialı rektorı bulğan.
Tabip äfändene ozatu
Tağın ber citäkçe alışındı. Kürenekle tabip häm oyıştıruçı Yuri Yefim ulı Säxäbetdinov “Tatarstankurort” berläşmäseneñ citäkçese bulıp ozaq yıllar buyı eşlägän ide. Profsoyuzlar berläşmäse qararı belän xäzer ul yalğa ozatıldı. 9 şifaxanäne berläştergän oyışmanıñ yaña citäkçese itep Eçke eşlär ministrlığınıñ sanitar bülege mödire urınbasarı Bakirov raslandı. Çüpräle rayonında tuıp-üskän yaña citäkçe düşämbe könne Qazan sanatoriyında urnaşqan älege berläşmä ofisında eşlärne qabul itte.
Rimzil Wäli
