Küptän tügel genä Vladimir Putin Rusiädä Migratsiä xezmäte häm Pasport-viza idäräsen berläştereläçäk qanun imzaladı. Bu berläşterelgän idärä rusiälelärgä çit il pasportı birü, ä çittän ilgä kerüçelärne qabul itü, alarnı terkäw belän şöğellänäçäk. Bilgele bulğança, älegä berläşterelgän oyışma tözelmägän, Migratsiä xezmäte, Pasport-viza idäräse xezmätkärläre kiläçäktä närsä bulır, üz eş urınnarıbıznı saqlap qala alırbızmı, dip borçıla. Rusiägä çittän kilergä yä bötenläygä qaytırğa teläwçelär dä uyğa qaldı. Yaña idärä niçek eşlär, yaña qanunnar qabul itelep, Rusiägä kerü qıyınlaşmasmı? Xäyer, bügenge köndä dä ilgä qaytu bik ciñel tügel. Millättäşlärebez öçen Tatarstanğa başqa illärdän küçenep qaytu da şaqtıy awır problema bulıp qala birä. Bu xaqta Azatlıq radiosına möräcäğät itep, üzläreneñ moñ-zarların citkerüçe çittäge millättäşlärebez şaqtıy. Xäyer, äytergä kiräk, soñğı aralarda andıylarnıñ sanı azaydı. Tatarstannıñ Migratsiä xezmäte citäkçese Nikolay Vladimirov mäğlümätlärenä qarağanda da, respublikağa çit illärdän qaytırğa teläwçelär uzğan yıllar belän çağıştırğanda kimegän. Alay da, tarixi watannarına küçep qaytırğa teläwçe tatarlar bügen dä bar. Bigräk tä, Bäysez däwlätlär berlegenä kergän Urta Aziä illärennän. Şuşı könnärdä dä genä Azatlıq radiosınıñ Qazan byurosında bulıp kitkän Färit äfände şular rätennän.
Min üzem Taşkentta tuıp üstem, läkin näselem monnan häm xäzer minem dä ata-babalar cirenä qaytasım kilä. Läkin monı eşläw bik awır. Aldan terkälü ütärgä kiräk. Bu şaqtıy qıyın, ozaqqa suzıla torğan eş. Qazanda eş tabu da ciñel tügel. Citmäsä, minem Üzbäkstanda alğan diplomım monda ğämäldä tügel. Üz eşemdä eşlär öçen miña xäzer yañadan uqırğa kiräk. Ä bu inde tañın aqça taläp itä. Watandaşlıq alu da Rusiädä bik ozaqqa – 5 yılğa suzılğan. Annan tağın ber problema kilep çıqtı. Min terkälep bettem, läkin miña Taşkentqa qaytıp, xatınımnı alıp kilergä kiräk. Bu oçraqta terkälü käğäze ğämäldän çığa häm min kire Qazanğa qaytqaç, yañadan terkälü ütärgä tieş bulam. Tatarlar öçen bu yünäleştä bernindi dä maxsus programmalar eşlämi ikänQaytuçılarnı Rusiä grajdanlığın aluda şaqtıy küp mäşäqät kötä. Terkälü, küpsanlı käğäz eşlärennän başlap, aqça citmäw, toru urını bulmawğa qädär. Qızğanıçqa qarşı, küpme genä söylänsä dä, respublikağa qaytırğa teläwçe millättäşlärebezgä yärdäm itü öçen maxsus programmalar, ciñeläytelgän watandaşlıq alu yulları eşlänelmäde. Belgeçlär, yaña idärä tözelgäç tä bu mäs’äläneñ uñay çişelüenä şiklänälär. Şulay itep, yıraq illärdän ata-babaları cirlärenä qaytırğa telägän millättäşlärebezgä watandaşlıq alu yulın ğomumi nigezdä genä ütärgä qala.
Gölnaz İlgizär
