Accessibility links

якшәмбе, 4 декабрь 2016, Казан вакыты 23:25

Amerika Quşma Ştatlarında yaña terror qurqınıçı - bu yulı saq astına finans üzäkläre alına


Amerika Quşma Ştatlarında yänä xäwef xäle - xakimiat ildä yaña terror ğämälläre bula ala dip kisätä häm alarnıñ bu yulı Washington häm New Yorkta urnaşqan möhim finans qorılmalarına qarşı yünälderelüe ixtimal dip belderä. Amerikan räsmi wäkilläre süzlärenä qarağanda, bu xaqta mäğlümat küptän tügel genä Aziädä totqarlanğan qayber şikle keşelärdän alınğan.

Terrorçılar höcüm itä alırlıq ixtimal xädäflär arasında Washingtondağı Dönya Bankı wä Xalıqara Valuta Fondı binaları, New Yorktağı mäğlüm birja, başqa şundıy ähämiatle finans qorılmalar atala, xörmätle tıñlawçılar. Yäkşämbedä Washingtonda ütkärelgän maxsus matbuğat oçraşuında Quşma Ştatlarnıñ eçke iminlek ministrı Tom Ridge, şul oyışmalarnıñ binaları tiräsendäge iminlek xäle "yuğarı" däräcäle qurqınıç tudırırlıq dip bäyälänä dide. Ridge ministrlığı, terrordan yanağan qurqınıçnı biş däräcäle, här däräcägä ayırım tös birelgän ülçäw belän bäyäli. Bügenge köndä kertelgäne "äflisun" tösendä, annan soñ iñ yuğarısı, "qızıl" töslese genä kilä. Terror qurqınıçınıñ artuın raslağan dälillär turında Tom Ridge bolarnı belderde.

Audio, Tom Ridge

"Şuşı küzläw xäbärläre bezgä bik üzençälekle detal''lär birde, andıy sıyfat, mäğlümatnıñ berniçä törle buluın häm berniçä urınnan alınuın iskä alğanda, bik siräk oçrıy häm ul, küläme wä üzençälege yağınnan şaqtıy şomlı" di Quşma Ştatlarnıñ eçke iminlek ministrı Ridge. Anıñ süzlärenä qarağanda, terror ğämälläre bombalar quyılğan maşinalar yardämendä yasala ala. Şuşı qurqınıçnıñ citdilegen şul da raslıy - inde düşämbedä New Yorkta, şähärneñ eşlekle üzäge Manhattanne New Jersey ştatı belän totaştırğan Holland tunnele aşa yök maşinaları xäräkäte tuqtatıldı. New York xakimiate, şähär üzägendäge möhim binalarğa kerüçelärne tikşerüne köçäytte, cämäğät urınnarında qorallı politsiä xezmätkärläre sanı arttırıldı. Tom Ridge, yanaw xaqında mäğlümatnıñ qaydan alınuın turıdan-turı äytmäsä dä, monıñ Pakstanğa, küptän tügel genä anda, terrorğa bäyle şikle keşelärneñ qulğa alınuına işarä itte.

Audio, Tom Ridge

"Şuşı xäwef xälenä kitergän mäğlümat, ildän çittä alıp barılğan küzläw eşläre häm xärbi tırışlıqlar näticäse bulıp tora häm bu äle moñardan tış, bezneñ bar dönyadağı berektäşlärebez, ayırım alğanda Pakstan belän xezmättäşlekneñ dä cimeşe" di Tom Ridge. "Washington Post" basması yazuına qarağanda, New York häm Washingtonda urnaşqan finans üzäklärgä höcüm yasaw ixtimalı turında xäbärlär, amerikan häm Pakstan ğäskärläreneñ uzğan atnada "äl-Qaidä"gä bäyle buluda şiklänelgän berniçä keşene totqarlawı näticäsendä alınğan. Moñardan tış, äle yül başında uq şul uq Pakstanda, "äl-Qaidä"neñ elemtä sistemasın qoruda şiklänelgän ber computer möhändise qulğa alınğan bulğan. Ägär dä bolar barısı da döres bulsa, yäğni amerikannar yaña terror qurqınıçları xaqında mäğlümatnı şulay aldan qazana alsa, bu 11-nçe sintäbr waqiğälärennän soñ zur alğa kiteş bulıp tora. Läkin "äl-Qaidä" turında mäğlümat tuplaw, älege törkemneñ berböten bulmawı säbäple, şaqtıy awır bulıp qala birä. Anıñ qanatı astında bügenge köndä härberse bäysez eş itkän ayırım oyışmalar cıyılğan, şuña kürä alarnıñ barısılarınıñ da nindi plannar qoruı xaqında tögäl mäğlümat alu mömkin eş tügel kebek.

Kärim Kamal
XS
SM
MD
LG