Accessibility links

Кайнар хәбәр

Başqortstannıñ Sverdlov ölkäsendäge daimi wäkillegenä ber yıl


Küptän tügel Başqortstan Respublikasınıñ Sverdlov ölkäsendäge daimi wäkillege açıluğa ber yıl tulu köne bilgeläp ütelde. Ber yıl küp waqıt tügel. Şulay bulsa da, başqort wäkillege tarafınnan bik zur eşlär başqarılğan. Äytik, Sverdlov ölkäse belän Başqortstan arasındağı Kileşü nigezendä 2003нче yılda ike töbäk arasındağı toyar äyläneşe 6 milliard 133 million sum külämenä citkän. Monnan tış, daimi wäkillekneñ turıdan-turı qatnaşı belän küptän tügel “Yekaterinburg-Ufa” säwdä yortı terkälep eşli başladı.

Başqortstannıñ Sverdlov ölkäsendäge daimi wäkile Näfisä Tyumenseva, wäkillekneñ ber yıllığına bağışlap uzdırılğan tantanalı kiçädä yasağan çığışında başqarılğan eşlärneñ sänäğät häm säwdä ölkäse belän genä çiklänep qalmawın assızıqladı.Soñğı yıllarda çınlap ta başqort milli tormışında bik zur uñay üzgäreşlär bulıp uzdı. Mäğärif, mädäniät üseşe küzgä kürenerlek. Yıl sayın başqort tele häm ädäbiäte buyınça olimpiadalar uzdırıla, anda qatnaşuçı balalarnıñ sanı yıldan-yıl kübäyä. Sverdlov ölkäsennän 6 uqıtuçı “Başqortstan Respublikasınıñ mäğärif otliçnigı” bilgesenä layıq buldı. 30 uqıtuçı bu yıl köz ikençe yuğarı belem alu turında diplom alaçaq. Başqortstan Sverdlov ölkäsendä yäşäwçe başqort balaların yıl sayın buşlay däresleklär, uqu äsbapları, näfis ädäbiät belän tä'min itä. Cäy könnärendä Başqortstan cirendä balalar öçen buşlay yal itü oyıştırıla. Här yıl sayın Sverdlov ölkäsennän yegermeläp bala Başqortstan uqu yortlarına byudjet nigezendä uqırğa kerä. Daimi wäkillek qaramağında Waleriä Tyumenseva citäkçelegendäge model'lär agentlığı, Sabina Sağitowa citäkçelegendäge “Göllär” ansamble eşläp kilä.

Uzğan közdä wäkillek “Başqort sıluı” bäygese uzdırdı. Bäygedä yegermeläp qız bala qatnaştı. Qızlar bügen dä wäkillekne üz öyläre kebek kürep yörilär. Alar biredä cırlarğa, biergä öyränälär, sälätlären üsterälär. Liliä Äxmätowa, mäsälän, Salawat Yulayıvnıñ 250 yıllığına bağışlanğan respublika konkursında “Başqort amazonkası” häm “Aqqoş” iyüllären biep, öçençe urınnı aldı.

Ğomumän, Näfisä Tyumenseva citäklägän wäkillek yäşlär belän bik nıqlap eşli. Yekaterinburgtağı taw akademiäse, yuridik akademiä belän tığız elemtä biredä uquçı student yäşlärne dä milli eşlärgä tartırğa yärdäm itä. Yäşlärneñ başqort milli eşlärendä küpläp qatnaşuı ölkä külämendä uzdırılğan törle bäyrämnärdä, festival'lärdä başqort milläten soqlanırlıq itep tanıta, matur bizäkle itep ayırıp tora.

Wäkillek tarafınnan ber yıl eçendä başqarılğan eşlärne ber tın belän genä sanap beterü mömkin tügel. Şuña kürä ber yıllıq bäyräm zur yubiley kebek uzdı. Tantanada Sverdlov ölkäse häm Yekaterinburg şähär xakimiätennän, ölkä sänäğät häm säwdä ministrlıysınnan, törle milli oyışmalardan kilgän qunaqlar qatnaştı. Qotlawlar, cılı süzlär küp buldı. Ärmän diasporası citäkçese Mixail Mnoyan barlıq oyışmalar isemennän çığış yasağanda, här diaspora şundıy qolaç belän eşli alsa ikän digän teläk belderde.

Başqort qorıltayına nigez salınğannan birle bergäläşep iñgä-iñ eşlägän dusları, teläktäşläre, xezmättäşläre Başqortstannıñ Sverdlov ölkäsendäge daimi wäkile Näfisä Tyumensevanı başqort riwayätlärendäge qäwemen, toqımın saqlap qaluda canın da jällämägän “İr-qız”ğa tiñlädelär. Başqortstannıñ Sverdlov ölkäsendäge daimi wäkillege açıluğa ber yıl tuluğa bağışlanğan tantana başqort tirmäse eçendä, milli aşlar belän sığılıp torğan çäy östäle yanında däwam itte.

Fäwiä Safiullina. Yekaterinburg.

XS
SM
MD
LG