Accessibility links

дүшәмбе, 5 декабрь 2016, Казан вакыты 13:31

Yekaterinburg şähärendä Sälim Ğalim ulı Fatıxovnıñ “Xatın-qızlarnıñ dönyaküläm tarixı” dip atalğan kitabın täqdir itü kiçäse bulıp uzdı


Bu könnärdä Yekaterinburg şähärendä Sälim Ğalim ulı Fatıxovnıñ “Xatın-qızlarnıñ dönyaküläm tarixı” dip atalğan kitabın täqdir itü kiçäse bulıp uzdı. Sälim Fatıyxov Çiläbe ölkäseneñ Magnitogorski şähärendä tuıp üskän. Tabiğäte belän töple fikerle, ezlänüçän, aqıllı keşe bularaq, qayda ğına bulırğa turı kilmäsen, qızıqlı fänni faktlar, yazmalar tuplağan. Bik zur, cawaplı eşlärdä eşlärgä turı kilsä dä (soñğı yıllarda Sälim äfände Çiläbe ölkäse gubernatorı xakimiätendä bik cawaplı urında eşli), börtekläp cıyılğan, ğömereneñ mäğnäsenä äwerelgän xezmät östendäge icat däwam itä.

Distälägän yıllar buyı cıyılğan ezlänülär bilgele ber sistemağa salına başlıy. Häm menä çirek ğasır waqıt uzğannan soñ, Sälim Fatıyxovnıñ xezmätläre törle räsemnär, fotosurätlär belän bizälgän, fänni faktlar belän bayıtılğan, añlayışlı ğadi tel belän yazılğan qalın tomlı kitap räweşendä dönya kürde. Sälim Fatıyxov Çiläbedä yäşäsä dä, kitapnıñ berençe täqdir itelüe Yekaterinburgta buldı. Avtor üze monı kitapnıñ ruxi başqalası näq menä şuşı quätle şähär buluı belän añlata. Anıñ äytüençä, yegerme biş yıl buyına cıyğan xezmätne şuşı kitap däräcäsenä citkerüdä Yekaterinburgta yäşäwçe zur ğalimnär küp köç kertkän.

Täqdir itü kiçäsenä ğalimnär, yazuçılar, şağirlär, jurnalistlar küp cıyıldı. Kiçä barışında kitapqa fänni-populyar xezmät digän bäha birelde. Ğomumän, ğalimnär tarafınnan da, ğadi uquçılar tarafınnan da kitap bik yuğarı bäha aldı.

Ni öçen näq menä xatın-qız teması quzğatqan soñ avtornıñ küñelen? Bu sorawğa cawap itep, Sälim äfände xatın-qıznı bar cihannıñ, tormışnıñ başı dip atadı, keşelek häm tormış tarixı xatın-qızdan başlana dip añlattı. Älege kitapnı qulğa alğaç, bitaraf qalu mömkin tügel. Avtor sezgä üz fikeren köçläp taqmıy, ämma uylanırğa, ezlänergä cirlek birä. Kitapnıñ bu sıyfatına da kiçä barışında yuğarı bäha birelde.

Sälim Fatıyxovnıñ “Xatın-qızlarnıñ dönyaküläm tarixı” dip atalğan täqdir itü kiçäse Yekaterinburg zıyalılarınıñ kürkäm oçraşu kiçäse dä buldı.

Fäwiä Safiullina. Yekaterinburg.

XS
SM
MD
LG