Accessibility links

чәршәмбе, 7 декабрь 2016, Казан вакыты 11:45

«Böyek İdel yulı» konferensiäseneñ 4nçe öleşe başlandı


Ul, aldağı 3senä qarağanda, tıynağraq şartlarda ütä. 2004 yılğı säfär barışında çit il şähärlärdä tuqtalışlar da yuq, qatnaşuçılarğa diñgezlärne kürü bäxete dä tätemi. «Böyek İdel yulı»nıñ konferensiäseneñ 4nçe öleşe avgustnıñ 3sennän başlap 10 sına qädär, Rusiä eçendä genä ütkärelä. «Qazan» korabı Peterbur, Yaroslavl, Kostroma, Tübän Novgorod häm Qazan portlarında tuqtayaçaq. «Böyek İdel yulı» konferensiäse 4 avgust könne Peterburda, Smolnıy sarayında başlanıp kitte. Anda Gubernator Valentina Matveenko bulırğa tieş bulsa da, anıñ urınına urınbasarı kilep, konferensiäneñ eşen tantanalı räweştä açıp cibärde, dip xäbär itä «İntertat» agentlığı. Qazan isemennän konferensiädä Qazan şähär başlığı Kamil İsxaqov çığış yasağan. Tatarstan prezidentı isemennän, Däwlät Şurası räise urınbasarı Rimma Ratnikova çığış yasap, Mintimer Şäymievnıñ sälämläw xatın uqıp birgän. Şuşında uq, Qazanğa 1000 yıl digän kürgäzmä dä eşlägän. Ermitajnı gizep çığu, Peterbur tatarları belän oçraşu da planğa kertelgän. Kiçen konferensiädä qatnaşuçılar, «Qazan» korabına utırıp, Peterburdan kitäçäk. Fänni-ğämäli konferensiäneñ eşe säfär waqıtında da däwam iteläçäk. Anda monografiäne yazarğa äzerlek söyläşüläre, «Böyek İdel Yulı»nıñ mädäni, ruxi mirası, turistik häm biznes yağınnan mömkinlekläre xaqında tügäräk öställär ütkärü planğa kertelgän. Ä eşläp arğan waqıtta, küñel açu programmaları da qaralğan. Mäsälän, qızıq oçraşular klubı qısalarında, Tatarstannan kilgän 60lap ğalim, cämäğät eçleklesen, çinovniklarnı, tağın distälägän çit il qunaqların, Mäskäw, Peterbur, Yaroslavl häm başqa şähär wäkilläreneñ küñelen Rusiäneñ atqazanğan artistı Al’bert Assadullin kütärergä tieş bula. Qazan artistları arasında Venera Ğaniyıvanıñ çığış yasarğa cıyınuı bilgele. Peterburdan soñ, qunaqlarnı Yaroslavl gubernatorı qabul itäçäk, annan soñ, Kostroma häm Tübän Novgorod xakimiätläre äzerlänep tora. Här tuqtağan cirdä, «Böyek İdel yulı»nda urnaşqan şähärlär belän xezmättäşlek turında kileşülärne imzalaw häm cirle tatar oyışması belän oçraşu qaralğan. «Böyek idel yulı» konferensiäneñ 4nçe kisäge Tübän Novgorodta tammalana. Avgustnıñ 10sında «Qazan» korabı Qazan portına kilep tuqtayaçaq. Konferensiäneñ 4nçe öleşe – soñğısı bulır, dip uylanıla. Kiläse 2005 yılda, Qazannıñ 1000yıllığında, Tatarstan başqalasında yomğaqlaw konferensiäse ütkärelergä tieş.

Bikä Timerova.

XS
SM
MD
LG