Accessibility links

пәнҗешәмбе, 8 декабрь 2016, Казан вакыты 19:09

Qazanda Salawatnıñ konsertları däwam itä


Qazannıñ Uniks tamaşalar zalında Salawat Fätxetdinovnıñ konsertları başlanıp kitte. Bıyıl cırçınıñ konsert programması ni xaqta, närsä turında bulır dip baş watuçılar, nihayät, tınıçlandılar. Salawatnıñ üzeneñ süzlärenä qarağanda, 16 tamaşa anıñ iñ yaqın dusları – avtorallilarda qatnaşuçı kollegaları täqdime buyınça tözelgän. Konsert Rusiädä xäzer bik populyar bulğan yäş başqaruçılarnıñ Yoldızlar fabrikası bäygese nigezendä eşlängän. Ğädättägeçä, Salawatnı tıñlarğa dip qazanlılar ğına tügel, respublikanıñ törle töbäklärennän kilälär. Ä menä cırçınıñ icatın yaratuçı Ruşaniä xanım – xätta Mäskäwdän kilgän. Anıñ Salawat konsertında alğan tä’sirlären tıñlap qarağız.

Min Salawatnı bik yaratam. Läkin elekkege konsertlarında ul küp söyläp, süz ostası kebek çığış yasasa, bu yulı Salawat kübräk cırladı. Bezgä bit anıñ tawışı, moñı ähämiätleräk. Bıyıl minem öçen bik awır yıl buldı, küñelem, yörägem bik ärnegän çaq ide. Şuña da Salawatnıñ cırları küñelemä ütep kerep, yaralanğan yörägemä däwa buldılar. Räxmät aña! Kiläçäktä dä cırçı saw-sälämät bulıp, üzeneñ cırları belän bezgä yäşärgä därt estäsen ide

Döres, ul Qazanğa Salawatnıñ konsertın ğına qararğa kilmägän. Ğailädä cäyge yallarnı qaya ütkärergä, digän soraw tuğaç, Ruşaniä xanım häm anıñ tormış iptäşe internet yärdämendä Tatarstandağı Qazan şifaxanäsen tapqannar. Häm, beryulı yal, däwa da bulır, millättäşlärebez belän dä aralaşırbız, dip, alar monda kilergä bulalar. Xäyer, bu xaqta tulıraq itep sez Ruşaniä xanımnıñ Azatlıq radiosınıñ Qazan byurosı jurnalistlarına birgän äñgämäsennän işetersez. Äñgämä comğa tapşıruıbıznıñ daimi rubrikası – Xikmätle xällärdä efirğa çığar.

Ä ğädättä Salawatnıñ konsertları ütä torğan Kamal teatrında xäzerge köndä remont eşläre bara. Anda säxnä, tamaşa zalın äybätlilär, texnik caylanmalarnı alıştıralar. Yañartılğan teatr binasında yaña ut, tawış, yaqtırtu caylanmaları yärdämendä berençe spektakl’ne teatr söyüçelär 22 oktäberdä, sezon açılğan könne kürerlär, dip kötelä. Älegä tözekländerü eşläre grafik buyınça bara, dip xäbär ittelär bezgä teatrda. Köz könne ük kamallılar tamaşaçılarğa premyera da wäğdä itä. Şulay uq alar 7 noyäber, tanılğan rejisser Marsel Sälimcanovnıñ 70 yıllıq yubileyı uñayınnan ul quyğan spektakl’lär atnalığın, kürenekle şäxesneñ xäter kiçäsen ütkärergä telilär.

Gölnaz İlgizär

XS
SM
MD
LG