Accessibility links

дүшәмбе, 5 декабрь 2016, Казан вакыты 05:33

Gruziä prezidentı Mixail Saakaşvili: "Qanun bozıp Abxaziä yarlarına kilgän här köymägä ut açılaçaq"


Gruziä prezidentı Mixäil Saaqaşwilinıñ qanun bozıp Abxaziä yarlarına kilgän här köymägä dä gruzin qarawıl köymäläre ut açaçaq, dip belderüen Rusiä doşmanlaşu bularaq qabul itte. Saaqaşwili şulay uq Rusiä turistlarınıñ Abxaziägä kilüenä qarşı ikänlegen dä äytte: “Abxaziägä kilgändä, min inde bu färmannı älegräk birgän idem häm xäzer dä raslím: Bezneñ sularğa kergän böten köymälärgä ut açılırğa tieş häm alar batırılırğa tieş. Rusiä turistlarına şunı äytäsem kilä, äle dä Gruzin qanına batqan bu cirlärgä şämsiäläregezne açarğa, gruzin başları tibelep yörgän urınnarğa kilmägez”. Rusiä tışqı äşlär ministerlığı belderüendä, Gruziä Abxaziädäge Rusiä watandaşlarına genä zían kitererdäy nindi genä adım yasasa da, tieşle cawapnı alaçaq dielä. Könyaq Osetiädä gruzin xärbiläre Rusiä Däwlät dumasınıñ Bäysez Däwlätlär Berlege qömitetı räise Andrey Qoqoşín citäkçelegendäge törkemgä attı. Bu xaqta Könyaq osetiä xakímítlarına tayanıp “İnterfaqs” xäbär itte. Törkem tınıçlıq saqlawçı köçlärneñ nığıtmaların qarap yörgändä, Osetiäneñ Sarabuq awılı yanında alarğa attılar. Törkem bu awıldan kitkäç, dip belderä Sxinwali, gruzin yağınnan mina atqıçtan köçle ut açqannar. Gruzin yağı bu mäğlümätne kire qaqtı. Töbäktäge polísí başlığı Sulxitaşwili, “Sarabuq awılı tiräsendä gruziäneñ tınıçlıq saqlawçı köçläre bulmadı häm xäzer dä yuq”, dip belderde.

XS
SM
MD
LG