Milli xäräkät köräşçeläre safları könnän kön sıyığaya bara. Şuşı könnärdä Bötentatar ictimaği üzäge räise Räşit Yagfärov wazifasınnan kitüen belderde. Säbäbe - ictimaği üzäk citäkçelegendäge büleneş häm tarqalış. Monnan ber yıllar elek ictimaği üzäktä räis eşçänlege belän kileşmi torğan törkem oyışqan. Bu törkem inde ber niçä tapqır räisne eşennän buşatu ğämälläre qılıp qaradı. Bötentatar ictimaği üzäge prezidiumınıñ soñğı belderüläreneñ bersendä şundıy ğämällär turında bolay äytelä. 17 yündä bu törkem Xäräkätneñ ustavına qarşı, 13 keşedän torğan BTİÜ prezidiumı häm anıñ räisen inqar itkän xäldä, cıyılış cıyğan häm räis itep BTİÜ veteranı Mars Şämsetdinovnı bilgelägän. Älege törkemneñ bu ğämällären BTİÜ prezidiumı ustav taläplärenä turı kilmi häm legitim tügel dip taptı. Şunnan soñ bu törkem Räşit Yagfärovqa prezidium häm plenum qarawına quymıyça ğına räislekne Mars Şämsetdinovqa birep taşlap kitärgä täqdim yasadı. Bu waqiğa turındağı mäs'älä 7 iyüldä BTİÜ prezidiumında qaraldı. R.Yagfärov qabat räislektän kitü turında iğlan itte, ämma prezidium äğzaları berdäm räweştä anıñ aldağı plenum yäki qorıltayğa qädär räislektä qaluın soradılar. Prezidium utırışında kileşelgänçä, oyıştıru mäs’äläse quyılaçaq plenum bıyıl “Xäter köne”nnän soñ, oktäberneñ ikençe yartısında bulaçaq, dielä BTİÜ prezidiumı belderüendä. Läkin pänceşämbe mäğlümat çaralarında Räşit Yagfärovnıñ açıq itep citäkçelektän kitäçäge turında belderüe äytelde. BTİÜneñ “Millät” mäğlümat mäcbuğasınıñ soñğı sanında xuşlaşu süzen ul bolay tämamlıy. “Kitäm. Qızğanıç ki, kitep barışlıy, üz adresıma “yarıy, eşlädeñ, räxmät” digän süzlär genä tügel, “revolyutsion” törkem tarafınnan: “buldıqsız”, ”milli xäräkätne tarqatuçı”, “BTİÜ binasın üzenä privatizatsiäläüçe ”, “maşinanı üzläşterüçe”, “BTİUneñ aqçasın urlawçı”, “başqortlarğa satıluçı” h.b. digän naxaq süzlär dä işetep, räncep kitäm. Nişlämäk kiräk, mondıy sıyfat bezneñ “revolyutsion” massalar öçen xas şul. Biğäybä.”
Yunıs Ätnäle, Qazan
Yunıs Ätnäle, Qazan
