Accessibility links

якшәмбе, 11 декабрь 2016, Казан вакыты 03:36

Çittäge tatarlarğa kem bulışır?


Bu atna Rusiädä sotsial tarmaqnıñ reforması, yäğni taşlamalarnı aqçalarğa alıştıru turında barğan qaynar bäxäslärdä ütte. 5 avgust könne Däwlät Duması öçençe uqılışta şuşı alıştırunı ğämälgä quya torğan 155 qanunğa östämälärne qabul itte. Läkin küpsanlı qarşılıq mitingları, aqça yaxşıraqmı, taşlamalarmı digän bäxäslär sürätendä ber möhim üzgärtü sizelmi ütte. Bu qanunnar Rusiä watandaşları öçen genä tügel, ä çit illärdäge millättäşlär öçen dä ähämiätle bulıp çıqtı. Çönki taşlamalarnı aqçalarğa alıştıru üzäk belän töbäk arasındağı byudjetara mönäsäbätlärne kileşterä torğan qanunnarğa da üzgäreşlär kertügä kiterde. Ä menä bu qanunnardağı qayber yaña qabul itelgän tözätmälär Rusiä töbäkläre aşa çittäge millättäşlärgä yärdäm itüne tıya. Xäzer älege yärdämne finanslaw barı tik federal’ üzäk aşa ğına bulaçaq. Ä töbäklär, şul isäptän Tatarstan da, älege qanunnar ğämälgä kergännän soñ çit illärdäge millättäşlärebezgä iqtisadi, sotsial yäisä başqa berär törle yärdäm itä almayaçaq. Alar belän xezmättäşlek turında qanun qabul itü dä tıyıla. Yıraqtağı millättäşlärgä xätta tel, mädäniätne öyränüdä dä bulışlıq kürsätü yaramayaçaq, monıñ öçen töbäklär qaznasınnan nindi dä bulsa aqça alu tıyılaçaq. Läkin elek-elektän millättäşlär belän aralaşı, alarğa mädäni, matdi, ruxi yärdäm kürsätü nigezdä barı tik cirle qazna aşa bara ide.

Älege qanun üzgäreşläre çittä yäşäwçe tatarlarğa da tä’sir itä, älbättä. Moña respublikada mönäsäbät nindi? Tatarstan Konstitutsiäsendä berketelgän yıraqtağı millättäşlärebezgä yärdäm itü xaqındağı matdä belän xäzer ni bulır? Älegä respublikada bu xaqta bernindi dä fikerlär işetelmäde. Yallar aldınnan räsmi oyışmalardan mäğlümätlär alıp bulmadı. Bötendönya tatar kongressınıñ çit ildäge millättäşlärebez belän şöğellänüçe bülektä dä bu yañalıqqa mönäsäbät beldererlek keşe älegä tabılmadı. Bu mäs’älä xaqında bez sezgä kiläse tapşırularıbızda äle söylärbez.

Gölnaz İlgizär

XS
SM
MD
LG