Accessibility links

Кайнар хәбәр

Ğiraqta yaña bäreleşlär qabınıp kitte


Atnakiç häm comğa irtäsendä şiği citäkçe Moqtada Äl-Sadrnıñ Mähdi armiäse belän koalitsiä köçläre arasnda qatı bäreleşlär buldı. İlneñ törle urınnarında bulğan atışlar näticäsendä 20läp Ğiraqlı häm ber amerikan xärbie haläk bulğan. Yün ayında ut tuqtatu turında ireşelgän kileşüdän soñ bu iñ qatı bäreleş bulıp tora.

Ğiraqta atna buyına artıp barğan kierenkelek atna axırına qatı bäreleşlärgä äwerelde. İlneñ üzäk wä könyaq töbäklärendä Moqtada Äl-Sadr taraflı ğisyançılar belän amerikan-britan xärbiläre arasında atışular buldı. Könyaqtağı Nassiria şähärendä ğisyançılar İtalian xärbilärenä xöcüm itte. Bäreleşlär şulay uq Bagdad, Nacaf, Basrada bulğan. Näticädä barlığı 20läp Ğiraqlı häm ber amerikan xärbie haläk bulğan. Östäwenä Nacafta ber amerikan boralağı bärep töşerelgän, ekipaj isän qalğan dielä. Yün ayında Äl-Sadr belän amerikannar arasında ut tuqtatu turında ireşelgän kileşüdän birle bu iñ qatı bäreleşlär buldı. Bäreleşlärneñ nidän qabınıp kitkäne älegä bilgesez. Söyläşülärendä aradaşçı wazifasın başqarğan Salam Äl-Xafaci New York Times gäzitenä äytüençä, atışular, amerikannar xärbi maşinalar belän Äl-Sadr yäşägän urınğa yaqınayğannan soñ başlanıp kitkän. Amerikannar isä xöcümne ğisyançılar başladı dip belderä. Äl-Sadrnıñ süzçese Mäxmüt Äl-Sudani kileşüne bozuda şulay uq amerikan xärbilären ğäyepläde. Berük waqıtta bügen Bagdadta ütkärgän matbuğat oçraşuında ul ğisyançılar qabat ut tuqtatırğa äzer dip belderde:

Audio (Mäxmüt Äl-Sudani)

"Ägär qarşı yaq kileşügä qädär bulğan wazğiätne qaytarırğa teläsä, bez waqıtlı xökümät belän bar bar çişelmägän mäsälälär turında söyläşergä äzer."

Könyaqtağı Amara şähärendä Äl-Sadr keşeläre bügen şähärne üz qulına töşerülären bäyräm itte. Bitlek kigän ber suğışçı üzen Ğiraqnı azat itüçe dip tanıttı:

Audio (ğisyançı)

"Ğiraqnı cimerergä teläwçelärgä häm törle agentlarğa şunı äytäm, bez Ğiraqnı ilbasarlardan häm agentlardan azat itäçäkbez."

Koalitsiä yağına basuçılarnı bizderü öçen ğisyançılar cirle räsmilärne, alarnıñ ğailä äğzaların totıq itep ala başladı. 3 ulı totıq itep alınğan Anbar gubernatorı Äbdel-Kärim Bärgäs atnakiç könne wazifasınnan kitüen belderde. Anıñ 3 ulı azat itelgän. Ğisyançılar taratqan video-tasmada Äbdel-Kärim gafu ütenä:

Audio (Äbdel-Kärim Bärgäs)

"Min Anbar gubernatorı Äbdel-Kärim Bärgäs möcäxetdinnärgä qarşı qılğan ğämällärem, qäfer amerikannar belän xezmättäşlek itkänem öçen Allahı täğälädän yarlıqaw sorıym, häm wazifadan kitüemne belderäm."

Şuşı atnada Quşma Ştatlar totıq aluçılarğa bernindi märxämät bulmayaçaq digän belderü yasadı. Koalitsiädäge 31 ilneñ 11-e bu belderügä quşıldı.

Ä menä Ğiraqta BMO xezmätkärlären saqlarğa tieş bulaçaq xalıqara iminlek köçlären tuplaw eşe älegä bik sülpän bara. Kofi Annnan süzlärençä, älegä ber genä il dä bu törkemgä quşılu telägen beldermägän. Quşma Ştatlarnıñ BMOdağı ilçese John Danforth, ägär başqa illär quşılırğa telämäsä, bu eşne Quşma Ştatlar, Britaniä, koalitsiäneñ xäzerge äğzaları başqaraçaq dip belderde.

Ali Gilmi, Praga
XS
SM
MD
LG