Accessibility links

шимбә, 3 декабрь 2016, Казан вакыты 14:50

Rayonnarda tatar milli-mädäni moxtariätläre tözelä


Küp kenä ictimağıy oyışmalar wäkilläre cäyge yallar çorında eşçänlegen tuqtatıp torsa da, Başqortstandağı tatar milli oyışmaları qul quşırıp utırmıy. Atnaqiç könne ber törkem tatar milli oyışmaları citäkçeläre häm aqtiv äğzaları Dürtöyle rayonında yörep qayttı. Alar anda tatar milli-mädäni moxtariäteneñ urındağı bülegen açu häm anıñ räisen saylaw öçen barğan ide. Dürtöyledäge tatar cämägätçelege belän kiñäşläşkännän soñ, bu rayondağı tatar milli-mädäni moxtariäten citäkläwne Rinat Säxibzadinğa ışanıp tapşırırğa buldılar. Rinat äfände rayonda bilgele keşe. Un yılğa yaqın inde ul biredä şäxsi eşquarlıq belän şöğellänä. Şul uq waqıtta tatar milli oyışmaları eşçänlegendä dä qatnaşa, rayondağı millättäşlärebezneñ zar-intizarların yaxşı belä.

Kiläse atna başında Rinat Säxibzadin Dürtöyledäge üze citäkläyäçäk tatar milli-mädäni moxtariäteneñ idarä sostawın oyıştıru öçen ayırım utırış ütkäräçäk. Anda bu idarägä saylanğan millättäşlärebez üzläreneñ eş plannarın bilgelärgä häm milli-mädäni moxtariätne räsmi terkätü öçen cawaplı keşelärne täğayınlärgä cıyına.

Dürtöyledäge milli-mädäni moxtariätne tözüdä qatnaşqan keşelärneñ berse, Tatarstannıñ Başqortstandağı Säwdä-iqtisadıy wäkilçelege citäkçese, Başqortstan Tatar kongressı Başqarma qomitetı räise urınbasarı Ramil Bignov äytüençä, august ayında Dürtöyledäge kebek moxtariätlär yänä dä küpçelek xalqın tatarlar täşkil itkän Baltaç häm Boray rayonnarında da tözeläçäk.

– Ä, ğomumän alğanda, tatar milli-mädäni moxtariätläreneñ urınnardağı büleklären Başqortstannıñ zur küpçelege tatarlar yäşägän yegermedän artıq rayonında tözü küz uñında totıla, – di Ramil äfände. – Alar Başqortstan tatar cämägätçelegeneñ urınnardağı teräge häm oyıştıruçı köçenä äwerelergä tieş. Annan soñ inde respublik külämendäge tatar milli-mädäni moxtariäte oyıştırılaçaq. Kiläçäktä isä respubliktağı barlıq tatar milli xäräkäte oyışmaların da şuşı milli-mädäni moxtariät qanatı astına tuplarğa, milli köçlärne ber yodrıqqa tuplarğa isäp. Andıy berdämlek bulğanda, Başqortstan tatarları problemnarın xäl itü öçen köräşü küpkä ciñelräk bulaçaq.

Ramil Bignovnıñ süzlärenä qarağanda, teläklär bik izge, älbättä. Ämma ul teläklärne tormışqa aşıru öçen dä näq menä şul berdämlek häm kileşep eşläw kiräk. Mäğlüm ki, qaysıberdä tatar milli oyışmalarına bik möhim bulğan berdämlek häm añlaşıp eşläw citmi qala. Ramil äfände süzlärençä, xäzer Başqortstandağı tatar milli oyışmalarına hiçberqayçan bulmağança, nıqlı berdämlek kiräk. Çönki respublikta tatar telenä dä däwlät tele statusı alu öçen referendum ütkärü, başqa möhim çaralarnı tormışqa aşıru tik berdäm eşlägändä genä mömkin bulaçaq.

Tel statusı digännän. Uzğan atnadağı utırışta tatar milli oyışmaları Rusiä citäkçelegenä şuşı mäsälä buyınça tağın da räsmi xatlar cibärergä kileşkän ide. Ramil Bignov süzlärençä, ul xatlar äzerlängän häm adresatlarına cibärelgän dä inde. Tik alarğa tiz arada ğına berär törle reaqsiä bulırmı – yuqmı, anısın farazlawı da çiten.

XS
SM
MD
LG