Accessibility links

якшәмбе, 11 декабрь 2016, Казан вакыты 05:14

Tatarstannıñ yartı yıllıq üseşenä yomğaq yasaldı


Tatarstannıñ 2004 yılnıñ berençe yartısında ictimaği häm iqtisadi üseş näticäläre xaqında respublikanıñ İqtisat häm sänäğät ministrlığınıñ kiñäytelgän kollegiäsendä söyläştelär. Älege utırışta respublikanıñ bar citäkçeläre - prezident ta, premyer-ministrı da, Däwlät Şurası räise dä, ministrlar da qatnaştı. Töp notıq belän İqtisat häm sänäğät ministrı Aleksey Paxomov çığış yasadı.

Anıñ çığışında menä nindi sannar kiterelde. 2004 yılnıñ altı ayında respublikada 150 milliard sumnan artıq tawar citeşterelgän häm xezmät kürsätelgän. Qayber tarmaqlarda bıltır belän çağıştırğanda şaqtıy ğına üseş tä küzätelä. Mäsälän, Ximiä häm neft’ ximiäse, maşina citeşterü häm metall eşkärtü kebek ölkälärdä üseş 17-18 protsentqa artqan. Respublikanıñ qayber töbäklärendä yäşäw däräcäse dä üskän. Mondıy küreneş Qazan şähärendä häm Tatarstannıñ neft’le cirlärendä – Älmät, Aznaqay, Tübän Kama, Bawlıda küzätelä ikän. Aleksey Paxomov respublikada qullanu äyberläreneñ bäyäläre artuı xaqında da äytte. Uzğan 6 ayda alarnıñ üseşe 10 protsentnı täşkil itkän. Urtaça xezmät xaqına kilgändä isä, ul yün ayında Tatarstanda 5743 sumnı täşkil itkän. İqtisatçılar fikerençä, här keşe isäbenä kerem 2003 yılnıñ yünendä 4500 sumnı täşkil itkän häm bıyıl ul 10 protsentqa diärlek artqan. Xezmät xaqların tülämäw oçraqları da uzğan yıl belän çağıştırğanda kimegän.

Monnan tış Tatarstannıñ İqtisat häm sänäğät ministrı tağın menä nindi sannar kiterde. Uzğan yartı yıllıqta respublikada 15 million tonna neft’ tabılğan, bu uzğan yıl belän çağıştırğanda 3 protsentqa diärlek kübräk. Şulay uq 30 meñnän artıq yök häm ciñel maşina, 5 milliardtan artıq avtomobil şinaları, 24 meñ tonna it, 103 meñ tonna söt häm söt produktsiäse citeşterelgän. Kollegiä utırışında süz şulay uq respublikada innovatsion eşçänlek turında da bardı. Mäsälän, yañaça eş oyıştıru xätta sälämätlek saqlaw ölkäsendä kertelä ikän. Bu xaqta Sälämätlek saqlaw ministrı söyläde.

Ä Mintimer Şäymiev isä üzeneñ çığışında, respublika elekkeçä çimal citeşterügä östenlek birsä dä, produktsiä citeşterüne dä arttırırğa tieş, çönki bu östämä tüläwdän alınğan salımnı arttırırğa mömkinlek biräçäk, dip äytte. Häm älege yünäleştä KamAZ, Qazanorgsintez, TübänKamaneftexim berläşmäläreneñ uñay täcribäsen bilgeläp ütte.

Gölnaz İlgizär

XS
SM
MD
LG