Accessibility links

якшәмбе, 4 декабрь 2016, Казан вакыты 13:13

Pakstandağı soñğı qulğa alular terrorğa qarşı köräşne köçäytäme?


Pakstan häm Amerika Quşma Ştatları xakimiate terrorğa qarşı köräştä yaña front açuı xaqında belderä. Soñğı atnalarda, şuşı ike ilneñ iminlek xezmätläre Pakstannıñ äfğan çige buyında "äl-Qaidä"gä bäyle buluda şiklänelgän keşelärne totuı, alarda yaña terror planarı açıqlanuı xaqında xäbärlär kilep tordı. Yäkşämbedä isä Berläşkän Ğäräp Ämirlekläre xakimiate İslamabadqa, Pakstanda tıyılğan "Xäräkät-ül-Cihade-İslami" törkeme citäkçesen tapşırdı. Amerikan citäkçelege, bolar barısı da "äl-Qaidä"neñ yaña höcümnär yasaw plannarına zur zian kiterde dip isäpli.

"Xäräkät-ül-Cihade-İslam"nıñ citäkçese Qari Säyfulla Äxtarnıñ qulğa alınuı xaqında Pakstannıñ mäğlümat ministrı Şäyex Räşidäxmät yäkşämbe könne xäbär itte.

Audio, Şäyex Räşidäxmät

"Bez Säyfulla Äxtarnıñ qulğa alınuın raslıybız, ul inde şaqtıy waqıt ezlänelgännän isemlegendä ide, tik bez anı haman taba almadıq. Anıñ qayda ikänlege bilgele tugel ide. Häm menä xäzer bez Ğäräp Ämirleklärennän anıñ anda buluı, qulğa alınuı xaqında xäbär aldıq, alar anı bezgä tapşırdı häm ul inde bezneñ qulda" dip belderä Pakstannıñ mäğlümat ministrı, "äl-Qaidä"gä bäyle dip farazlanğan suğışçan törkemneñ citäkçese turında. Pakstan citäkçelege, Äxtarnı qulğa alu, anıñ "äl-Qaidä" belän bäyläneşläre nıq buluı säbäple, terrorğa qarşı köräştä şaqtıy zur uñış bulıp tora dip isäpli. Moña qädär şul uq Pakstanda, suğışçan islam çeltärenä ütep kerü häm yaña höcümnär planlaştırunı tuqtatu tırışlıqları yasalğan ide. Yänä mäğlümat ministrı Räşitäxmät.

Audio, Şäyex Räşitäxmät

"Bez xäldän kilgänne eşlibez, menä ähämiatle keşelärne qulğa aldıq. Bez berqayçan da waq-töyäk, yäisä yomışçı ğına bulıp yörgän keşelär artınnan çapmıybız, planlaştırğannarın ezlibez. Şularnıñ iñ ostaların bez totqarladıq" dip belderä Pakstan ministrı. Anıñ fikerençä, xäzer inde terrorçılar üz höcümnären zur xädäflärgä yasıy almayaçaq, yasarğa telägän oçraqta da moña ireşü alarğa elekkegä qarağanda awırraq bulaçaq.

Audio, Şäyex Räşitäxmät

"Xäräkät-ül-Cihade-İslam"nıñ citäkçese Säyfulla Äxtar 90-nçı yıllarda Pakstannıñ iminlek xezmätläre belän tığız elemtädä torğan keşe sanala ide. Soñraq anıñ şul törkeme tıyıldı häm ul ildän qaçıp kitärgä mäcbür buldı. Xäzer inde anı qulğa alu, prezident Pärwäz Möşärräf xökümäteneñ, Quşma Ştatlar citäklägän köräşkä çın küñeldän quşıluın kürsätkän işarä bulıp tora. Pakstannıñ iminlek xezmätläre küptän tügel genä ikençe ber mäğlüm keşene, şulay uq "äl-Qaidä"gä bäyle dip sanalğan "Xäräkätül Möcähidin" törkeme başlığı Fäzälür Räxman Xälilne qulğa alğan ide. Yül ayında tağın Möxämmäd Nurxan isemle ber computer belgeçe totqarlandı, añarda suğışçan islamçılar äzerlägän qayber möhim höcümnär turında şaqtıy ähämiatle mäğlümat tabıldı dip xäbär itelde. Amerikan basmaları yazuına qarağanda, Quşma Ştatlar xakimiate ildäge iminlek çaraların, berençe çiratta näq menä Nurxan computerında tabılğan mäğlümat nigezendä bermä-ber arttırırğa bulğan. Pakstan häm Berläşkän Ğäräp Ämirleklärennän tış şikle islamçılarnı qulğa alular Britaniädä dä ütte.

Kärim Kamal
XS
SM
MD
LG