Accessibility links

якшәмбе, 4 декабрь 2016, Казан вакыты 19:29

Mäskäwdä İslam dinen qabul itüçelär sanı arta


Mäskäwneñ Jizn gazetası uzğan atna sanında çeçen yegete Ruslan Baysarovqa kiäwgä çıqqan tanılğan cırçı Kristina Orbokayte niqax belän yäşi, Mäskäwneñ cämig mäçetendä alarğa niqax uqığannar, alarnıñ ulları Deni da möselman qanunı nigezendä sönnätkä utırtılğan, çeçen telen öyränä, xattä Qorännän sürälär yatlıy dip yazıp çıqtı. Bu xaqta gazetağa Ruslan Baysarovnıñ änise 78 yäşlek Qäsirät Baysarova söylägän. Min bu xäl çınlap ta döresme dip Rawil xäzrät Ğäynetdinnän soradım. Läkin ul monda bernindi gäcäplänerlek xäl kürmim, bu inde bügen genä tügel, küptän bulğan waqiğa dide. Häm ul, iñ gäcäbe, xäzer ğalimnär dä islam dinen qabul itä dip, ber qızıqlı xäbär bäyän itte.

Audio (Rawil xäzrät Ğäynetdin)

Rawil Ğäynetdin belän äñgämädän soñ mäçet yanında mine yawlıq yapqan ike qız tuqtattı. Alar minem başımdağı yawlıqqa işarä itep, minnän rus telendä, Sez möselmanmı, dip soradılar da bersen berse bülä-bülä möselmanlıqnı qabul itär öçen nindi doğalar belergä kiräk, bezne qabul itärlär mikän, mäçettä islam qanunnarın öyrätä torğan däreslär barmı, dip soraşırğa totındılar. Alar belän söyläşkännän soñ min, bu xanımnarnıñ berse islamnı inde tuğız yıl elek qabul itkänlegen, ikençeseneñ dä möselman bulırğa teläge barlığın beldem. Alar ikese dä Hindstannan kilgän möselman yegetlärenä kiäwgä çıqqanar. Min äle islam dinen tulısı belän totam, dip äytä almıym dide berse. Barı tik Ramazan ayında uraza ğına totam. İslamnı tiränräk öyränäsem kilä dide ul. İkençe xanım, min çirkäwgä kerä almıym, mina yarımay belän yoldız oxşıy. Çönki ul küktän kilä, miña möselman dine oşıy dide. Çınlap ta Rawil xäzrät äytmeşli, İslam qabul itärgä atlığıp toruçılar küp ikän dip uylarğa urın bar.

Näzifä Kärimova, Mäskäw

XS
SM
MD
LG