Accessibility links

дүшәмбе, 5 декабрь 2016, Казан вакыты 03:41

Qazanda avia häm kosmos texnologiäläre kürgäzmäse açıldı


Bu çara Rusiä xökümäteneñ 2003 yılğı qararı belän ütkärelä. Tatarstan bu kürgäzmädä, töp iğtibarnı, Tu-214 oçqıçına häm «Ansat» boralağına yünältergä teli.

Aviatsiä ölkäse üseştä! Tatarstan xökümäte başlığınıñ kiñäşçese Nazir Kireev, matbuğat oçraşuında ene şulay belderde. Aviatsiä ölkäse, soñğı 15 yılda berençe tapqır, çın mäğnäsendä eşli başladı häm belgeçlär aldında yaña, zamança texnologiälär turında uylanu ixtiacı kilep bastı. Andıy kürgäzmä Qazanda inde berençe ütkärelmäsä dä, 2004 yılğı bu çaranıñ üzençälege bar. Anda çit il citeşterüçeläre dä qatnaşa, häm buyıl berençe tapqır, xärbi maqsatlarda qullanıla torğan avia texnologiälärne, kiñ cämäğätçelek iğtibarına täqdim itälär. Mäsälän, kürgäzmädä, Qazanda eşlängän «Ansat» xärbi boralağın kürep buldı. «Aqtay» kebek ciñel häm Mi-17 kebek citdi xärbi boralaqlar turında da mäğlümat birelde. Qazan Avia-citeşterü berläşmäse oçqıç motorların kürgäzmägä quydı, küp küç quyğan Tu-214, Tu-234 oçqıçları turında da küp mäğlümat birde. 90nçı yıllarda bulğan üzgärtep qorulardan soñ, Tatarstan aviatözeleş oyışmaları nigezendä keçkenä şirkätlär oyışıp eşli başlağan. Mäsälän, kürgäzmädä «Fermer» digän keçkenä oçqıçnı kürep buldı, yıraqtan torıp idärä itelä torğan küzätüçe, räsemgä töşerüçe, hawadan torıp mäğlümatlar citkerüçe, uyınçıq kebek kenä oçqıç ta täqdim itelde. Kürgäzmädä şulay uq, Sember, Jukovskiy, Mäskäw, Sarapul häm avia tözeleş ölkäsendä eş alıp bara torğan başqa şähär wäkilläre qatnaştı. Jurnalistlar öçen ütkärelgän matbuğat oçraşuında, şuşı ölkädä eşläwçe fänni üzäklären, citeşterü oyışmaların berläşterüçe zur avia korporatsiäne tözü turında da süz bardı. Belgänegezçä, bu xaqta, zamanında Rusiä xökümäteneñ räise urınbasarı Boris Aleşin Qazanğa kilep, Tatarstan citäkçelege belän söyläşülär uzdırğan ide. Tatarstan xökümäte räiseneñ kiñäşçese Nazir Kireev äytkänçä, respublikanıñ älege korporatsiäne tözü tärtibenä qarata üz sorawları bar, şuña Tatarstan avia citeşterüçeläre älege korporatsiägä kerergä aşıqmıy.

Kürgäzmädän tış, avia tözeleştä eşläwçe oyışma wäkilläre, ğalimnär «Avia hä Kosmos texnologiäläre» digän fänni konferensiädä dä aralaşa aldı. Bu fänni cıyın 10nçe avgustta eşli başladı. Tatarstannıñ aviatsiäne üsterü ölkäsendä uñay da, tiskäre dä, ämma üz täcribäse bar. İqtisat ministrı birgän mäğlümatlarğa qarağanda, Tatarstan byudjetınnan Tu-214 oçqıçın tözügä häm sertifikatlar aluğa barlığı 2,5 milliard sum sarıf itelgän. Yaña Tu-324 oçqıçın yasawğa 7,3 million dollar birelgän bulğan. Boralaqlar citeşterüçe şirkätlärgä 1 milliard sumnan artıq aqça küçerelgän. Ämma, xakimiätlär zur ömetlär bağlağan Tu-214 oçqıçın küpläp citeşterä başlaw, anı lizingka birü tärtibe uylanıp citkerelmägänlektän, kilep çıqmağan.

Bikä Timerova.

XS
SM
MD
LG