Accessibility links

якшәмбе, 11 декабрь 2016, Казан вакыты 11:13

Näcäftäge şiği çualışları Ğiraqnı totrıqlandıru ömetlären sürelderä


Ğiraqnıñ Näcäf şähärendä inde altınçı kön bäreleşlär däwam itä, alar sişämbedä dä tuqtalmadı. Amerikan ğäskärläre anda şiği ruxanie Moqtada äl-Sadrnıñ qorallı tarafdarlarına qarşı köräşä. Näcäftäge suğışlarnıñ däwam itüe Ğiraqnıñ waqıtlı xökümäte öçen zur problema bulıp tora häm totrıqsızlıqnıñ şiğilär yäşägän başqa ölkälärgä taralu qurqınıçın arttıra.

Näcäftäge uram suğışları tönlä ara-tirä atışlar belän çiklänsä, köndez çın bäreleşlär räweşen ala, xörmätle tıñlawçılar.

Audio, uram suğışları

Şiği möselmannar öçen izge sanalğan şuşı şähärneñ iske ziratı yanında menä şundıy suğışlar bara, amerikan ğäskärläre anda inde menä altınçı kön mäğlüm şiği ruxanie Moqtada äl-Sadr tarafdarları belän köräşä. Düşämbe kiçen yaqlar atışlarnı ber köngä tuqtatıp toru turında kileşkän ide, läkin sişämbe irtän anıñ ğämäldä bulmawı açıqlandı.

Audio, kisätü

Amerikan xärbiläre Näcäf xalqın, Ğiraq politsiäse belän xezmättäşlek itärgä häm bäreleşlär barğan şähär mäxällälären taşlap kitärgä öndi, qorallı ğisyançılar belän bernindi dä ut tuqtatu kileşüe yuq dip belderä. Äl-Sadr da üz yağınnan düşämbe könne Ğiraq xökümäteneñ qorallar tapşıru taläben kire qaqtı häm üz köçläreneñ soñğı qan tamçısına qädär suğışaçağın äytte. "Reuters" agentlığı xäbärçese Näcäftä, üzen Angliädän kilüçe dip tanıtqan ber ğisyançı belän söyläşkän, ul, amerikannarğa qarşı köräşü öçen Näcäfkä şiği möselmannar bar Yevropadan kilä dip belderä.

Audio, ğisyançı

"Amerikannarğa häm berektäşlek köçlärenä şunı äytergä telibez - bez biregä bar Yevropadan kildek häm bezgä äle kiläçäktä dä quşılırğa teläwçelär, inşaalla, citärlek. Bu alarğa bezdän, ğömerlärebezne fida qılarğa äzer toru turında ber kisätü, bez alarnı bertuqtawsız bombalap toraçaqbız" dip kisätä şiği ruxanie Moqtada äl-Sadrnıñ Mähdi ğäskäre suğışçısı Ğiraqtağı Könbatış berektäşlege köçlären. Näcäftäge bäreleşlär Ğiraqnıñ İyäd Ğälläwi citäkçelegendäge waqıtlı xökümäte öçen citdi sınaw bulıp tora. Alarnı tuqtata almağan häm Näcäftä tärtip urnaştırmağan oçraqta Ğälläwineñ dä, bar xökümätneñ dä abruyına, anıñ ilne totrıqlılıqqa kiterü tırışlıqlarına zur zian sala ala. Şuña kürä dä räsmi Bagdad bu mäs''älädä qırıs eş itärgä tırışa. Läkin ikençe yaqtan, äl-Sadr tarafdarlarına qarşı zur suğış başlap cibärüneñ dä üz qurqınıçları bar. Berençedän bu ğadi xalıq arasında küpsanlı qorbannarğa kiterä ala, ikençedän, uram bäreleşläreneñ Näcäftä urnaşqan izge urınnarnı cimerüe ixtimal. Ul oçraqta qänäğätsezlek Ğiraqnıñ bar şiği xalqında uyana häm ğisyanğa alar da quşıla ala. Tınıçsızlıqlar turında xäbärlär Bagdadnıñ şiğilär yäşägän Sadr mäxälläsennän dä kilä başladı, misal öçen. Anda xäzerge waqıtta amerikan tankları urnaştırılğan dip xäbär itelä. Ğiraqnıñ sälämätlek saqlaw ministrlığı mäğlümatına qarağanda, Bagdad tiräsendäge çualışlarda atna başınnan birle 10 keşe üterelgän häm 104 keşe törle cäräxätlär alğan. Näcäftäge yuğaltular xaqında räsmi xäbärlär yuq, amerikan xärbiläre genä anda 360-lap Mähdi suğışçısın yuq itüe xaqında belderä. Ä älegä Ğiraqnıñ şiği şähärläre nigezdä yabılğan xäldä qala birä.

Kärim Kamal
XS
SM
MD
LG