Accessibility links

пәнҗешәмбе, 8 декабрь 2016, Казан вакыты 03:21

BMOnıñ Ğiraqqa yärdäm programması qısalarında korrupsiä küreneşlären tikşerü eşe kötelgännän ozağraqqa suzılaçaq


Berläşkän Millätlärneñ Ğiraqqa yärdäm itü programması qısalarında korrupsiä ğämällären tikşerüçe bäysez komissiä başlığı Paul Volcker, qarap çığası mäglümätlär şul tiklem küp ki, näticälär yasaw öçen tağın ber yıl kiräk bulaçaq, dip belderde. BMO räsmiläre tikşerügä ayaq çala digän xäbärne Volcker kire qaqtı häm Ğiraq räsmiläre komissiä belän tulı xezmättäşlek itä dide.

Farsı qultığı suğışınnan soñ Ğiraqqa yärdäm itü maqsatı belän iğlan itelgän Neftkä almaşqa azıq-tölek dip atalğan programma Berläşkän Millätlär tarixında iñ zur programma buldı. 1996-dan alıp 2003nçe yılğa qädär bu programma qısalarında Ğiraq nefte 61 ilneñ 250 kompaniäsenä satıldı. Monıñ bäräbärenä 3meñ-yarım şirkät Ğiraqqa humanitar yärdäm kürsätte. Quşma Ştatlar Kongressınıñ tikşerü komissiäse mäglümätenä qarağanda Ğiraqnıñ elekke rejimı şuşı programmadan 10 milliard çaması dollar aqça urlağan. Älege korrupsiä ğämällären Yustitsiä ministrlığı häm Ğiraqnıñ yaña xökümäte dä tikşerä.

3 ay elek Berläşkän Millätlär üzeneñ bäysez komissiäsen buldırdı. Tikşerü näticäläre şuşı yıl axırına kötelä ide. Düşämbedä bu komissiäneñ räise Paul Volcker, bez, cıyğan mäglümätlärne äle tikşerä genä başladıq, dokumentlar sanı 15 millionnan arttı, alarnı qarap çığu öçen tağın ber yıllap waqıt kiräk bulaçaq, dide. Zamanında Amerikanıñ Üzäk Bankın citäklägän Paul Volcker süzlärençä alar başqa komissiälär belän dä xezmättäşlek itä, läkin bezneñ komissiä berençel, dide ul. Volcker süzlärençä, anıñ komissiäse, berençe çiratta, bu tärtip bozularda BMOnıñ cawaplılığın açıqlarğa tırışa, alay da, aqçalarnıñ här ike yaqqa yöreşen tikşerergä kiräk bulaçaq, dide ul.

Audio (Paul Volcker)

"Bu şaqtıy külämle häm çeterekle mäsälägä äylänep bara. Läkin bezgä monıñ eçenä kerergä, BMOnıñ häm eçendä häm tışında bulğan xällärne nıqlap tikşerergä kiräk bulaçaq."

Qayber tänqitçelär BMO räsmiläre bu tikşerülärgä ayaq çala digän ide. Volcker monı kire qaqtı. Anıñ süzlärençä, BMO räsmiläre komissiägä bernindi qarışılıq kürsätmi häm alar bu programmada qatnaqşan barlıq idarälärne centekläp tikşerergä cıyına. Komissiä başlığı fikerençä, bu eş kiläse yılnıñ urtasına qädär däwam itäçäk.

Ali Gilmi, Praga
XS
SM
MD
LG