Accessibility links

шимбә, 10 декабрь 2016, Казан вакыты 00:17

Yekaterinburda TNV tapşıruların qarıylarmı?


Yekaterinburg şähärendä eşläp kilüçe “Milli Media-Xolding” citäkçeläre küptän tügel Sverdlov ölkäseneñ tatarlar tuplanıp yäşi torğan tağın un töbägendä Tatarstan “Yaña ğasır” sputnik telekanalı tapşıruların qararğa caylaştırılğan komplektlar quyu eşen tögällädelär. Bötendönya tatar kongressı başqarma komitetı häm Sverdlov ölkäse biznesmennarı yärdäme belän bügenge köndä ölkä buylap 32 urında şundıy caylanmalar eşli. Alar xalıq küpläp cıyılıp qarıy ala torğan urınnarğa, yäğni klublarğa, kitapxanälärgä, mäktäplärgä, xätta mäçetlärgä urnaştırılğan. Küpme xezmät, köç, aqça sarıf itelgän bu eş xalıq öçen faydalı buldımı soñ? Qarıymı xalıq Qazan tapşıruların?

Şunı açıqlaw niäte belän, bez ölkäneñ könbatışında urnaşqan tatar awıllarına yunäldek. Ärtä rayonınıñ Bikmät awılına kilep citkäç, uramda berençe oçrağan xanım yanında tuqtadıq. Säwiä isemle urta yäşlärdäge bu xanım TNV tapşıruları belän bik tanış ikän. Aña bigräk tä şimbä könnärendä bula torğan tanılğan artistlar tormışı turındağı tapşırular oşıy ikän. Säwiä xanım tatar konsertların da bik yaratıp qarıy. Ä şulay da din-äxlaq turısında tapşırular kübräk bulsın ide dip teli ul. Anıñ uyınça, comğa kön kiç kürsätelä torğan dini tapşırular ğına citmi.

Bikmät belän Ust'-Man'çaj arası ike çaqrım tiräse. Bu yaqlardağı kürşe awıllar barısı da waqıt tapqanda Ust'-Man'çaj mäktäbenä cıyıla ikän. Olı keşelär fikeren belgäç, yäşlärne dä kürep söyläşäse kilep kitte.Vadim digän yegetkä 18 yäş ikän. Tatar tapşıruların qararğa bik teläp yöri. Anı tatar konsertları da, yañalıqlar da, tatar yäşläre tormışı da qızıqsındıra. Tatar yäşläre tormışı turındağı tapşırular kübräk bulsın ide dip teläde Vadim.

Ust'-Man'çaj mäktäbenä kerep çığarğa uyladıq. Cäyge kanikullarnıñ iñ qızğan çağı, mäktäp bikleder digän şik belän mäktäp yanına kilep tuqtawğa, işektän uqu eşläre bülege mödire Räsilä xanım Waxitova kilep çıqtı. Ul äle yalda, ämma tapşırular qararğa da, küz-qolaq bulırğa da mäktäpkä kilgäläp yöri ikän. – “Cäyge eş östenä qaramastan, xalıq kilgäli, - di Räsilä xanım, - Televizor belän antenna koridorda tora, RayONOdan kilgän qunaqlar aptırıylar, niçek urlamıylar dip. Bezdä xalıq bik tärtiple. Qazan tapşıruların yaratıp qarıybız, Tatarstanda yäşäwçelärneñ tormış räweşennän ürnäk alırğa tırışabız”.

Başqa awıllarda da xalıq waqıtı bulğanda tapşırular qararğa yöri ikän. Klubta urnaştırılğan caylanmalarnı kübräk yäşlär qarıy. Ämma şunısı bar, tapşırular programmasın xalıqqa citkerü äle xäl itelmägän mäs'älä bulıp qala birä. Küp kenä qızıqlı tapşırularnı qayberäwlär belmi qala. Cirle gazetalar arqılı programma bastıru mä’säläse çişelmägän. Dimäk, bu eşne oyıştıruçılarnıñ eşne axırına qädär citkeräse bar äle.

Fäwiä Safiullina. Yekaterinburg.

XS
SM
MD
LG