Accessibility links

җомга, 9 декабрь 2016, Казан вакыты 03:00

Tatarstanlılar Abxaziädä yal itärme?


Respublikada soñğı arada torğan qorı, esse könnär çärşämbe könne yañğırlı, salqın hawa torışı belän alışındı. Qızudan integüçe şähär xalqı älege üzgäreşkä ällä ni aptıramasa da, awıl xucalığı xezmätkärläre moña ber dä söyenmäde. Nik disäñ, respublika qırlarındağı bıyılğı uñışnıñ äle nibarı öçtän ber öleşe genä cıyıp alınğan. Bu xaqta awıl xucalığı ministrı urınbasarı Minsäğir Nuretdinov xäbär itte. Ul şulay uq ikmäkneñ bıyılğı bäyäläre xaqında da äytte. Ministrlıq sanawları buyınça bıyıl 3 klasslı boday yaqınça 4200 sum toraçaq. Bıltır anıñ bäyäse 3500 sumnı täşkil itkän.

Respublikada inde qışqa äzerlek tä başlanıp kitte. Tatenergo berläşmäse Ğädättäntış xällär ministrlığı belgeçläre belän bergälektä üzläreneñ oyışmaları häm anıñ filiallarınıñ qışqı şartlarda özleksez eşläwgä äzerlegen tikşerep, bulğan citeşsezleklärne beterü yulların qarayaçaq.

Xäbär itüebezçä, Qazanda II xalıqara avia häm kosmos texnologiäläre kürgäzmäse däwam itä. Älege kürgäzmäneñ inde berençe näticäläre dä kürenä başladı. Qazannıñ oçqıçlar yasawçı aviatsiä berläşmäse belän Slovak Airlines aviakompaniäse arasında kileşü tözü niäte xaqında belderelde. Slovak Airlines Gorbunov isemendäge aviatsiä berläşmäsennän ike TU-214 oçqıçın alırğa teli ikän. Yaña oçqıçlar aviakompaniädä qullanışta bulğan iske Boinglarnı almaştıraçaq, dip xäbär itte Slovak Airlinesnıñ general’ direktor urınbasarı Robert Domcek. Şulay uq alar äle citeşterelä dä başlamağan yaña TU-334 oçqıçı belän dä qızıqsınuların beldergännär.

Slovak aviakompaniäse belän xezmättäşlek äle planda ğına bulsa, respublikanıñ Könyaq Koreyanıñ LG şirkäte belän xezmättäşlege inde başlanıp ta kitte. 2004 yılnıñ noyäberendä Tübän Kamada älege firma neft’ eşkärtü kompleksın tözügä kereşäçäk. Bu xaqta Mintimer Şäymievnıñ LG firması citäkçese belän oçraşuınnan soñ xäbär itelde.

Tatarstan premyer-ministrı Röstäm Miñnexanov citäkçelegendäge respublika delegatsiäse sişämbe könne Abxaziä respublikasında bulıp qayttı. Alar anda xakimiät wäkilläre belän oçraştı, ike respublika arasında xezmättäşlekne arttıru xaqında söyläşte. Tatarstan qunaqları Abxaziädä yal itü mömkinleklärenä ayıruça zur qızıqsınu belderdelär. Şulay itep, tatarstanlılar da qayber Rusiä säyäsätçeläre kebek ük Gruziädän qurıqmıyça Abxaziä kurortlarında yal itärgä riza kürenä.

Gölnaz İlgizär

XS
SM
MD
LG