Amerikan xärbi köçläre häm Ğiraq ğaskärläre Nacaf şähärendä şiğilärgä qarşı soñğı höcümgä äzerlänä. Nacaftağı maxsus köçlär başlığı polkovnik Anthony Haslam, xärbilär – şiğilär yulbaşçısı Moqtada as-Sadr köçlärenä qarşı çarağa soñğı äzerlek xästären kürä, dip belderde. Bäreleşlär inde ber atna däwam itä.
Nacaf şähär başlığı Adnan al-Zorfi, Frans Press mäğlümat agentlığına, ägär dä höcüm planlaştırılsa – amerikan xärbiläre şiğilärneñ izge ğibädät urnı sanalğan Nacafqa kermäskä tieş, barı tik Ğiraq ğaskärläre kerä ala, digän ide.
Nacaftağı bäreleşlär waqıtında yözlärçä amerikan xärbie häm as-Sadr suğışçıları hälak buldı häm yaralandı. Älegä bu waqiğalär 6 atna elek premyer-ministr bulğan İyad Älläwi öçen iñ zur problema buldı. Bügen as-Sadr üz suğışçıların, üze üterelsä yä qulğa alınsa da köräşne däwam itärgä çaqırdı. İrannıñ yuğarı ruxi citäkçese Ayatolla Ali Khamenei, amerikan köçlären şiğilärneñ izge Nacaf şähärenä kerüläre öçen ğayepläde, möselmannar moña tüzep tormayaçaq, dip belderde. Nacafta imam Alineñ mavzoleyı bar. İmam Aline şiği möselmannar Möhammäd päyğambärneñ eşen däwam itüçe dip sanıy.
