Accessibility links

шимбә, 10 декабрь 2016, Казан вакыты 11:58

Sankt-Peterburg Qazan belän tanışaçaq


Çittäge millättäşlärebez yärdämendä Qazannıñ meñyıllığına äzerlek şähärneñ üzendä genä tügel, ä Rusiäneñ başqa töbäklärendä dä bara. Menä Sankt-Peterburgta yäşäwçe Xalidä häm Räşid Ğiläcevlar da Qazannıñ olı yubileyın bäyräm itügä üzläreneñ öleşlären kertergä bulğannar. Bilgele rässam Räşid Ğiläcev häm anıñ tormış iptäşe şağirä Xalidä xanım Piterda inde küptännän yäşäsälär dä, Qazan, Tatarstan belän araların özmilär. Äledän-äle monda alarnıñ kürgäzmäläre ütä, üzläreneñ icatı öçen ilhamnı da Ğiläcevlar yış qına tuğan yaqlarında taba. Şuña da, tanılğan icatçılar Qazannıñ meñyıllıq yubileyın iğtibarsız qaldırmasqa bulğannar. Xalidä häm Räşid Ğiläcevlarnıñ Sankt-Peterburg şähärendä eşläp kilüçe Qäläm häm pumala berlege Rusiäneñ bu şähärendä Qazannıñ meñyıllığına bağışlanğan kürgäzmä oyıştıru niäte belän çıqqan.

Bu kürgäzmädä Tatarstanda tuıp-üsep, Piternıñ yuğarı uqu yortların tämamlap, xäzerge monda şunda yäşäp icat itüçe rässamnar, şağirlär, sänğät belgeçläre qatnaşaçaq. Kürgäzmä 2005 yılnıñ 12 yünennän 7 yülenä qädär Sankt-Peterburg şähäreneñ iñ zur Manej zalında uzaçaq. Çığışları belän Tatarstannan bulğan Sankt-Peterburg rässamnarınnan tış älege kürgäzmädä Qazan icatçıları da qatnaşaçaq. Bu yulı Ğiläcevlarnıñ Tatarstanğa kilüläre dä bulaçaq kürgäzmädä qatnaşırlıq icatçılar, alarnıñ eş ürnäkläre belän tanışu. İñ layıqlılar kiläse cäydä Piterda uzaçaq çarada qatnaşırğa çaqırılaçaq, di Räşid Ğiläcev. Bu eştä alarğa respublikanıñ Rässamnar berlege citäkçese Abrek Abzgildin bulışa ikän.

Qazanğa kilüneñ tağın ber maqsatı – kürgäzmäne äzerläwdä häm ütkärüdä yärdäm äzläw. Çönki älege zur çarağa äzerlek inde küptännän başlansa da, eşlär bik ciñel genä barmıy. Bu xaqta Xalidä Ğiläceva söyli.

Qazannıñ meñyıllığına äzerlek komitetın bez inde 2004 yılnıñ ğinwarında ük oyıştırdıq. Çığışları belän Tatarstannan bulğan Piterda yäşäwçe icatçılarnıñ kürgäzmäsen bez inde şähärneñ 300 yıllıq yubileyına arnap ütkärmäkçe idek. Läkin kilep çıqmadı. Xäzer bez Qazannıñ yubileyı uñayınnan kürgäzmä oyıştırırğa cıyınabız. Komitet inde eşli başladı. Bez Tatarstan prezidentına açıq xat belän möräcäğät ittek, Sankt-Peterburgniñ Nur gäcitendä dä yazmalar bastırdıq. Bezneñ möräcäğätkä şähärebezdä yäşäwçe şaqtıy bilgele rässamnar, sänğät belgeçläre üzläreneñ yärdämen täqdim itte. Läkin Piternıñ iñ abruylı zallarınıñ bersendä zur kürgäzmä oyıştırır öçen äle küp eşlärgä kiräk. Bez bar telägän keşegä yärdäm sorap möräcäğät itäbez

Şulay itep, Piterda yäşäp icat itüçe Xalidä häm Räşid Ğiläcevlar üzläreneñ yaqtaşların Qazan, anıñ meñyıllıq tarixı, bügenge mädäniäte belän tanıştırırğa teli. Häm bu awır eştä Tatarstannan da yärdäm kötä.

Gölnaz İlgizär

XS
SM
MD
LG