Accessibility links

Кайнар хәбәр

Könyaq Osetiädäge wäzğiat kinät kiskenläşep kitte, anda ülüçelär bar


Pänceşämbegä qarşı töndä Könyaq Osetiädä soñğı yıllarda küzätelgän iñ dähşätle bäreleşlär buldı. Şular näticäsendä anda kimendä 3 keşe hälak buldı, berniçäse yaralandı. Aña qädär Könyaq Osetiä başqalası Tsxinvali tiräläre tup utına totılğan ide. 90-nçe yıllar başındağı kierenkelektän soñ töbäktäge wäzğiatneñ bolay qatlawlı bulğanı yuq ide äle.

Könyaq Osetiä başqalası häm anıñ tiräsendäge awıllarda yäşäwçelär öçen pänceşämbegä qarşı tön yoqısız ütte. Tönge ikedä anda atışlar başlandı häm alar 7 säğät däwam itte.

Audio, atışlar

Könyaq Osetiäneñ matbuğat häm mäğlümat komitetı räise İrina Gagloeva süzlärenä qarağanda, Tsxinvali häm anıñ tiräsendäge osetin awıllarında atışlar näticäsendä 30-lap keşe törle cäräxätlär alğan. Ämma iñ awır yuğaltular gruzin yağında bulğanğa oxşap tora. Gruziäneñ iminlek ministrı urınbasarı Gigi Ugulava bügen xäbärçelärgä, Tamaraşeni awılında 3 keşeneñ hälak buluı xaqında belderde. Şuşı gruzin awılı Tsxinvalidän berniçä yöz metr yıraqlıqta ğına yata. Osetin da, gruzin yağı da birgän älege sannar bäysez çığanaqlardan raslanmadı, elekke oçraqlardağı kebek ük här taraf ta atışlar başlaw öçen ğäyepne ber-bersenä tağa. Gruziäneñ il eçendäge nizaqlarnı caylaw eşen alıp barğan däwlät ministrı Giorgi Xaindrava Tbilisidä, tönlä bulğan atışlar 1992-nçe yılğı qorallı bäreleşlärne yañartu tırışlığı bulıp tora dip belderde.

Audio, Giorgi Xaindrava

"Wäzğiatne Tbilisidän torıp açıqlaw bik awır, tik ut açu bezneñ mänfäğättä tügel, tönlä bulğan xällär bezne yaña suğışqa tartu omtılışı bulıp tora, monı isä bez qatği kire qağabız. Ni qızğanıç, Gruziä xalqınıñ ber öleşenä şundıy qurqınıç yanağan wäzğiattä bezgä utqa cawap qaytarudan başqa çara qalmıy" di üzäk gruzin xökümätendäge däwlät ministrı Xaindrava. Rusiäneñ Könyaq Osetiädäge solıx saqlaw köçläre wäkile Nikolay Baranov süzlärenä qarağanda, atışlar osetinnar yäşägän Prisi awılı yağınnan başlanğan. Läkin ul berük waqıtta, bu äle monıñ öçen osetin yağı ğäyeple dip äytügä nigez birmi dip tä belderä. Töbäktä kierenkelek yün başında, Gruziä Könyaq Osetiägä üzeneñ eçke eşlär ministrlığı ğäskärlären kertergä bulğaç arta başladı. Räsmi Tbilisi monı, Könyaq Osetiäneñ Rusiä belän çigendäge yäşeren säwdägä çik quyu maqsatında eşläwen äytte. İnde distä yıldan artıq üzäk gruzin xökümätenä buysınmıy yäşägän Tsxinvali isä, Gruziäneñ şuşı ğämäle artında prezident Mixail Saakaşvilineñ Könyaq Osetiäne kire üz xakimiatenä qaytaru tırışlığı yata dip isäpli. İlneñ bötenlegen torğızunı Saakaşvili iñ möhim maqsatı itep quyğan ide. Acarstannıñ küpyılğı citäkçese Abaşidzedän qotılıp, anda üz idaräsen urnaştırğannan soñ ul xäzer iğtibarın Könyaq Osetiägä häm Abxaziägä yünältergä buldı di Könyaq Osetiä xakimiate. Tbilisi älege ğäyepläwlärne kire qağa, Gruziäneñ bötenlegen torğızu eşe fäqät säyäsi söyläşülär aşa ğına alıp barılaçaq dip belderä. Berük waqıtta ul Tsxinvalidäge xökümätne, Gruziä köçlärenä qarşı köräşü öçen yalçı ğäskär tuplawda ğäyepli. Bu atnada räsmi säfär belän Mäskäwdä bulıp kitkän Giorgi Baramidze, Gruziäneñ saqlanu ministrı, Tbilisi üz ğäskärlären nizaq töbägennän çığarırğa äzer, läkin ul monı Könyaq Osetiä üzendäge qorallı törkemnärne häm "qanunsız xärbi bülekçälärne" tulısınça taratqan oçraqta ğına eşliäçäk dip belderde.

Audio, Giorgi Baramidze

Gruziä saqlanu ministrı Baramidzeneñ Mäskäwdä äytkän süzläre. Tönlä qabınıp kitkän atışlardan soñ Rusiä citäkçelege atnakiç, töbäkkä yuğarı däräcäle yaña wäkillek cibäräçägen xäbär itte. Tışqı eşlär ministrı urınbasarı Valeri Loçinin, Könyaq Osetiädäge wäzğiat säğät sayın naçaraya bara häm tizdän kontrol''dän çığa ala dip belderde.

Kärim Kamal
XS
SM
MD
LG