Accessibility links

Кайнар хәбәр

Gretsidä XXVIII Olimpiä uyınnarı açıla; Tatarstannıñ yäşlär häm sport ministrı Marat Bariev belän äñgämä


13 awgust, comğa könne Gretsiä başqalası Afenda 28nçe olimpiä uyınnarı açıla. Ber ğasırdan artıq waqıt ütkännän soñ Olimpiada yänä Gretsiägä qayta. Äzerlek eşlärenä 6 milliard euro sarıf itkän greklar bar dönyanı şaqqatırırğa cıyına. 2001neñ 11 sintäberennän soñ bu berençe cäyge uyınnar, şul säbäple iminlek çaralarına iğtibar ayıruça zur. 19 kön baraçaq yarışlarda 202 ildän 10 meñ yarım sportçı qatnaşa, şul isäptän, Tatarstan, Başqortostan sportçıları.

Borıñğı greaklar bügenge Afen qalasın häm anda ütäçäk zamança olimpiä uyınnarın kürsälär tanımaslar ide. Bezneñ däwergä qädär 776nçı yılda ütkän berençe olimpiä yarışında ni barı ber tör – yögereş bulğan. 1896da Afenda ütkän berençe zamança uyınnarda inde 43 bäyge bulğan. Ä menä comğa könne Afenda açılaçaq 28nçe Olimpiä uyınnarında 202 ildän kilgän 10 meñ yarım sportçı sportnıñ 28 törendä 301 altın medal öçen köç sınaşaçaq. Ägär oyıştıru öçen altın medal qaralğan bulsa, anı hiçşiksez uyınnarnı oyıştıru komitetına, anıñ citäkçese Gianna Angelopulos-Daskalakiğa birep bulır ide. 2004 yıl olimpiada xucası itep Afen 1997dä iğlan itelde. Ämmä törle tartqalaş, kiçektürlär belän 3 yıl ütep kitte. Gretsiäneñ Olimpiadağa äzerlege soñğı waqıtqa qädär soraw astında ide. Axır çiktä Gianna xanım wazğiätne üz qulına ala aldı. Bügen ul Gretsiä uyınnarğa äzer dip belderä. Ä inde Afennıñ is kitmäle, yaña stadionında ütäçäk açılu tantanasın kürgän keşelär şaq qataçaq di oyıştıru komitetı başlığı Gianna Angelopulos-Daskalaki:

Audio (Gianna Angelopulos-Daskalaki)

"Açılu tantanasında muzıqa, biyü, tamaşa telendä borıñğı Gretsiäneñ tarixı, bu uyınnarnıñ niçek barlıqqa kilüe sürätlänäçäk. Ul bar dönyanı şaq qattıraçaq, ğäcäpkä qaldıraçaq."

Oyıştıruçılar tamaşanıñ neçkäleklären ser itep saqlasa da, tınğısız jurnalistlar qayberlären qazıp çığaraldı. Stadionnıñ idäne bermälne su belän tulıp diñgezgä äylänäçäk. Utlı yolldız hawağa atılıp suğa töşäçäk häm 5 Olimpiä bocrasın qabızaçaq. Alay da iñ zur surpiz axırda kötelä, oyıştıruçılar, monısı çınalap ta ser, di.

11 sintäber xöcümnärennän soñ bu berençe cäyge Olimpiä uyınnarı. Älbättä inde iminlek mäsäläsendä iğtibar ayıruça zur. Tärtip saqlawğa 7 meñ xärbi, politsiä, iminlek xezmätkäre cälep itelgän. Grek räsmiläre NATOdan yärdäm soradı. Hawadan daimi küzätü bulaçaq. Patriot raketaları safqa bastırılğan. Moña östäp här il üz çaraların kürä. 1972 yılda München olimpiadasında İzrailneñ 11 sportçısı üterelgän ide. İzrail komandası Afenda da östämä çaralar küräçäk. İzrailneñ Mäğärif häm sport ministrı Limor Livnat bolarnı äytte:

Audio (Limor Livnat)

"Münxenda 11 İzrail 11 sportçısı üterelgännän soñ bez yaxşı beläbez: terror ğämälläre xättä olimpiä uyınnarında bula ala, bigäräk tä 11 sintäberdän soñ. İzrail komandası terror qorbanı bulmas öçen älbättä östämä çaralar küräçäk."

Olipmiä uyınnarınıñ käyefen bozarday tağın ber närsä bar, ul da bulsa doping mäsäläse. 2000 yılda Sydney olimpiadasında doping qullanğan 11 sportçı totılğan ide. Berniçä sportçı Afen uyınnarınnan da çitlätelde. Xalıqara Meditsina Komissiäse başlığı Arne Ljungquist süzlärençä yaqın arada tağın berniçä qarar kötelä:

Audio (Arne Ljungquist)

"Bolay dip äyter öçen berniçä säbäp bar, di Ljungquist: berençedän, tikşerülär sanı arttı. Häm iñ möxime: Olimpiada barışında, xättä yarıştan tış tikşerülär waqıtında da, tıyılğan matdälärneñ tulı isemlege qullanılaçaq."

Olimpiä uyınnarı ğädättä säyäsättän çittä torırğa tırışa. Läkin ul bareber ütep kerä. Bıyılğı uyınnarda Ğiraq sportçıları da qatnaşa. Amerikan sportçılarına, ciñülären tinaq bäyräm itergä quşılğan, näfrät uyatmas öçen. İke Korea sportçıları açılu tantanasına bergä çığaçaq häm 2008 uyınnarında ber komanda bulırğa cıyına. Quşma Ştatlar, Qıtay, Germaniä belän ber rättän Rusiä komandası iñ zurlardan bulaçaq. Rusiä saflarında Başqortstannan 13, Tatarstannan 10 sportçı bar. Tatar-başqortlar da şaqtıy. Bu turıda bez bügen Tatarstannıñ yäşlär häm sport ministrı Marat Bariev belän söyläşep aldıq. Xäzer şul äñgämäne täqdim itäm.

Audio (Marat Bariev)

Sez Tatarstannıñ yäşlär häm sport ministrı Marat Barievnı tıñladığız. Ul üze Olimpiadanıñ ikençe öleşenä barırğa cıyına. Bez anıñ belän elemtädä torırğa kileştek.

Ali Gilmi, Praga
XS
SM
MD
LG