Accessibility links

чәршәмбе, 7 декабрь 2016, Казан вакыты 23:26

Äfğanstandağı amerikan xärbiläre Taliban qüwäten sındıruı xaqında belderä


Radiobız xäbärçese Ahto Lobjakas pänceşämbe könne Äfğanstandağı amerikan ğäskärläreneñ Xost wilayätendä urnaşqan Camp Salerno xärbi nığıtmasında bulıp qayttı. Anıñ süzlärenä qarağanda, andağı amerikannar Taliban yağınnan yanağan qurqınıçnı uñışlı ğına beterüenä ışana. 9-nçı üktäbrgä bilgelängän prezident saylawları aldınnan yaña bäreleşlär kötelsä dä, Taliban inde elekke qüwätenä iä tügel dip uylıy Äfğanstandağı amerikan xärbiläre.

Äfğanstannıñ könyaq-könçığışında yatqan Xost, Paktiä, Lowğar häm Nangarhar wilayätläre elek Talibannıñ oyası sanala ide, şuşı töbäk Äfğanstannıñ Pakstan belän tişekle çige yanında bulu säbäple, qorallı ğısyançılar anda ike il arasında şaqtıy irekle yörde. Läkin xäzer wäzğiat üzgärä dip belderä Äfğanstandağı amerikan xärbiläre. Taliban qaldıqları belän bäreleşlär yışraq bulsa da, bu berençe çiratta, Quşma Ştatlar ğäskäreneñ yaña, höcümçän taktika alıp baruı säbäple di alar. Xärbilärneñ berse, Camp Salerno nığıtmasına berketelgän Lance Alford xäbärçebezgä, Taliban suğışçılarınnan kilgän qurıqınıçnı bolay bäyäläde:

Audio, Lance Alford

"Ul qurqınıç zäğif. Alar höcüm öçen çikneñ törle cirlärennän ütep qarıylar, läkin här şundıy oçraqta bez alarnı yuq itäbez" di Alford. Läkin soñğı aralarda Äfğanstanda bäreleşlärneñ artuı turında xäbärlär kilüe ser tügel, monı amerikan xärbiläre üzläre dä tanıy. Ämma alar, suğışlarnıñ kiskenläşüen dönya mäğlümat çaraları döres añlatmıy dip isäpli. Quşma Ştatlarnıñ Äfğanstandağı 18 meñläp ğäskärien citäklägän general Eric Olson.

Audio, Eric Olson

"Mäğlümat çaraları monı iminlek wäzğiateneñ naçarayuı dip bäyälärgä tırışa, läkin bu alay tügel. Berektäşlek köçläre xäzer äwzemräk eş itä başladı, alar elekkegä qarağanda küpkä yışraq höcüm itä. Kiresençä, min iminlek xäzer yaxşıra bara dip isäplim, di general Olson. Anıñ süzlärenä qarağanda, telgä alınğan bäreleşlär alar amerikan xärbiläre başlap cibärgän, kisätü bäreleşläre. "Bezgä höcüm itmilär, bez üzebez höcüm itäbez" dip belderä amerikan generalı. NATO qorallı köçläre başlığı general James Jones ta anıñ şul fikere belän kileşä, Äfğanstanğa kilep Camp Salernodağı xärbilärgä ul şulay dip belderde. Berük waqıtta amerikan yağı, Talibanğa qarşı äwzemräk eş itü äle, ul oyışmanıñ zur zian sala alu säläte inde beterelde dip äytüne añlatmıy, di. Aldağı saylawlar ütkärüne özärlek törkem bularaq Taliban zur qurqınıç bulıp qala birä häm anı citdi qabul itärgä kiräk di amerikan xärbiläre. Älegä alınğan xäbärlärgä qarağanda, inde sanap kitelgän paştun wilayätlärendä tawış birü öçen terkälü eşe caylı ğına alıp barıla häm keşelär saylawlarda qatnaşu telägen belderä. Terkälü häm tawış birüne oyıştıru eşen saqlawnı amerikan ğäskärläre Qabuldağı üzäk xökümätneñ qorallı köçläre belän bergä alıp bara. Xäbärçebez, bu cirle xalıqnıñ Könbatış berektäşlege köçlärenä mönäsäbäten yaxşırtuğa yardäm itä dip belderä.

Kärim Kamal
XS
SM
MD
LG