Accessibility links

Кайнар хәбәр

Başqortstanda waqıtınnan alda saylawlar bulırmı?


Başqortstanda «Mosqovskiy qomsomoles» gäziten aldıruçılar bu basmanıñ soñğı, 13 august sanındağı «Start v niquda» dip isemlängän yazmanı ayıruça qızıqsınıp uqığandır. Mixäil Rostovskiy isemle jurnalist bu yazmanıñ iseme astına «Ni öçen Putinnıñ revolúsísı barıp çıqmí» dip atalğan soraw da quyğan. Autor süzlärençä, üz reformaların uñışlı ğına başlağan Putin äfändeneñ säyäsäte körçekkä terälep bara. Mixäil Fradqov citäklägän xäzerge xökümät qomandası da üz wazífaların tieşençä başqara almí. Bu ğäyepläwlärenä jurnalist äfände sallı ğına dälillär dä kitergän kebek. Çınlap ta xökümätneñ eşçänlege ğädi xalıqta da, jurnalistlarda da qänäğätsezlek uyata, anısı mäğlüm närsä.

Mäskäw türäläre xaqında eç serlären açıp salğannan soñ, mäqälä autorı Rusiä töbäklärennän häm alarnıñ citäkçelärennän dä ğäyep ezli başlí. Mäqäläseneñ «Minı regionov», yäğni «Töbäklär şartlatqıçları» dip isemlängän öleşendä jurnalist Başqortstan belän Tatarstannı da şeltäläp ala. Tatarstan prezidentın iseme belän ük atamasa da, Başqortstan citäkçese Mortaza Räximovnıñ isemen tiskäre yaqtan telgä ala. Şunnan ber özektä mondí süzlär bar:

"Başqortstanda, mäsälän, federal üzäk yañadan urındağı citäkçe Räximov belän urtaq tel tapqan kebek ide. Xätta aña yañadan prezident bulıp saylanu mömkinlegen dä birdelär. Ämma bu töbäktä bügenge köndä ığı – zığılar köçäygännän köçäyä. Tatarstandağı häm Başqortstandağı säyäsi elitlar yaqın yıllarda ozaq citäkçelek itkän älege xaqimnärne almaştıru öçen äkrenläp äzerlek alıp bara. Üzlären häm üz baylıqların, aqçaların saqlap qalu maqsatında, urındağı mağnatlar mölkätlären çit illärgä küçerä."

Mäskäw basmalarında töbäklär citäkçeläre xaqında törle imeş – mimeşlär eş qına basılıp tora. Mintimer Şäymievkä bik awır qağılmasalar da, bu cähättän Mortaza Räximovqa tayaknıñ yuan başı yışraq töşä. Äle «Mosqovskiy qomsomoles» gäzitendä basılğan mäqälä dä Başqortstan prezidentı küñelenä sarı may bulıp yatmastır, möğäyen. Soñğı atnalarda Başqortstanda bıyıl waqıtınnan alda prezident saylawlar kampanísı başlanaçaq, digän süzlär quyıra başladı. Dimäk, Räximov äfände xaqında törle ruxta yazılğan mäqälälär sanı da artuı ixtimal.
XS
SM
MD
LG