Accessibility links

пәнҗешәмбе, 8 декабрь 2016, Казан вакыты 23:22

Dürtöyledä tatar milli-mädäni möxtäriäte oyıştırıla


Uzğan programnarıbızda Başqortstannıñ tatarlar tuplanıp yäşägän häm küpçelek xalqın tatarlar täşkil itkän rayonnarında tatar milli– mädäni moxtarítların oyıştıru yünäleşendä zur eşlär başlanıp toruı xaqında söylägän idek. Tatarstannıñ Başqortstandağı Säwdä – iqtisadí wäkilçelege citäkçese, Başqortstan Tatar kongressı Başqarma qömitetı räise urınbasarı Ramil Bignov süzlärenä kürä, republíknıñ yegermedän artıq rayonında Tatar milli – mädäni moxtarítların oyıştıru küzallana. Alar urınnardağı tatar cämäğätçelegeneñ teräge häm oyıştıruçı köçe bulırğa tieş.

Uzğan atnada Dürtöyle rayonında da çirattağı tatar milli – mädäni moxtarítın tözü buyınça eşlär başlanğan ide. Anıñ räise itep rayondağı kiñ bilgele eşquar häm cämäğät eşleklese Rinat Säxibzadin täğäyenlände. Ä bu atnanıñ çärşämbesendä Rinat äfände milli – mädäni moxtarítnıñ täwge utırışın ütkärde. Rayonnıñ tatar milli xäräkätendä aktíf eşlär başqarıp kilüçe 33 keşe qatnaşqan bu cíılışta milli – mädäni moxtarítnıñ räise urınbasarı, rewiziä komíssísı äğzaları häm 11 keşedän torğan idarä şurası saylandı. Xäzer Dürtöyle rayonı Tatar milli – mädäni moxtarítın räsmi terkätü xästärlekläre başlana. Şuşı eş öçen kiräkle doqumentlar belän Ufağa kilgäç, bez milli – mädäni moxtarít räise Rinat Säxibzadin belän oçraştıq häm aña yaña oyışmanıñ üz eşçänlegen närsädän başlarğa cíınuı xaqnıda beleştek. Menä şul äñgämädän ber özek tıñlap alíq.

(yazma)

Sez Başqortstannıñ Dürtöyle rayonında äle genä tözelep kilüçe Tatar milli – mädäni moxtarítı räise Rinat Säxibzadin fikerlären işettegez. Rinat äfände saf tatar rayonı bulğan Dürtöyledä tatarlarnıñ milli– mädäni ixtíacların qänäğätländerü öçen zur eşlär başqarıp bulırına nıqlı ışana. «Bu täñgäldä yaña ğına oyışıp kilüçe Tatar milli – mädäni moxtarítı bigräk tä zur köçkä äwerelergä, başqa cämäğätçelek oyışmaların da üz artınnan iärtergä tieş», – dip isäpli Rinat Säxibzadin. August ayında Tatar milli – mädäni moxtarítları republíknıñ Baltaç häm Boray rayonnarında da tözeläçäk. Alarda äle moña äzerlek eşläre alıp barıla. Ä yıl azağına qädär cämğese yegermedän artıq tatar rayonında milli – mädäni moxtarítlar tözüne tögälläw qaralğan. Başqortstandağı tatar milli xäräkäte wäkilläreneñ zur küpçelege rayonnarda milli – mädäni moxtarítlar tözüne xuplí häm bu eştä yärdäm itä. Ämma millättäşlärebezneñ ber öleşe bu başlanğıçqa ikelänüle qaraş belderä. Alar fikerençä, bügenge köndä republíkta yaña tatar milli oyışmaları buldırğançı, moñarçı oyıştırılğannarın häm räsmi terkälgännären näticäle eşlätü çaraların kürü maqsatqa yaraşlıraq bulır ide. «Elegräk tä başqa töbäklärdä oyıştırılğan Tatar milli – mädäni moxarítları älläni eş qírata almadı, çönki alarğa däwlät yağınnan finans yärdäm bulmağaç, qorı entuzíazm, küñel omtılışı belän genä yıraq kitä almísıñ», – dip belderä andí skeptiklar. Şundí keşelärneñ berse – republíktağı kürenekle tatar ğälime, iqtisad fännäre doktorı, professor Rinat Ğatawllin. Tatar milli – mädäni moxtarítların oyıştıruğa qağılışlı, «Azatlıq» radíosına tübändäge fikerläre belän urtaqlaşa ul.

(Rinat Ğatawllin)

Sez Başqortstan rayonnarında Tatar milli – mädäni moxtarítların tözügä qarata republíktağı kiñ bilgele tatar ğälime, iqtisad fännäre doktorı, professor Rinat Ğatawllinnıñ fikerlären tıñladığız.

Fänis Fätxi, Ufa.

XS
SM
MD
LG