Bu arada respublikada, bigräk tä Qazanda, sport, yaqtaş sportçılarıbız belän qızıqsınu arttı. Moña berençe çiratta Gretsiäneñ Afina şähärendä 13 avgust könne açılğan Olimpiä uyınnarı säbäp bulğandır. Tatarstan sport yaratuçıları anda qatnaşuçı yaqtaşlarıbız häm millättäşlärebezneñ çığışların ayıruça zur qızıqsınu belän qarap, ciñülärenä şatlanıp toraçaq. Xäyer, olimpiadadağı ciñülär häm ciñelülär äle alda. Ä menä Qazannıñ Rubin futbol komandası canatarları yaratqan komandalarınıñ ciñülären inde bäyräm itä ala. 12 avgust kiçendä Rubin berençe märtäbä Evropa däräcäsendäge uyında ciñü yawladı. UEFA kubogı öçen köräşneñ berençe etabında Qazan futbolçıları Avstriäneñ Rapid komandasın 2-0 xisabı belän ciñde. Uyınnıñ Venada ütüenä dä qaramastan, rubinlılar qawşap qalmadı häm belgeçlär fikerençä, şaqtıy däräcäle Evropa klubına bireşmäde. Rubin futbolçılarına bireşmäskä Venağa maxsus çarter belän Kamil İsxaqov citäkçelegendä barğan Qazan xakimiäte wäkilläre dä bulıştı. Rapid komandası belän ikençe uyın inde Qazanda 26 avgustta bulaçaq.
Uramda cäy buluğa da qaramastan, Tatarstannıñ xokkeyçıları da yal itep utırmıy. Başqa yarışlar bulmağan arada, alar ber-berse belän köç sınaşa. Tübän Kamada 12 avgust könne uzğan uyında Nefteximik komandası Aq bars xokkeyçıların 3-2 xisabı belän ciñä.
Gölnaz İlgizär
