Accessibility links

Кайнар хәбәр

Tatar internet qullanuçılarnıñ iğtibar üzägendä - Olimpiä uyınnarı


Dönya Olimpiä uyınnarı belän şaşıp yörgändä, tatar internet qullanuçıları da mawıqtırğıç tamaşadan çittä qalırğa telämi. İrek Bikininnıñ «Tatarskaya gazeta» saytında Olimpiä uyınnarında qatnatuçı tatar sportçıları turında söyläşü başlanıp kitte. Amerikada yäşäwçe millättäşebez, ul virtual dönyada üzen Sabircan dip tanıştıra, New York Times gäzite Rusiä sportçılarınıñ räsemen bastırğan, dip xäbär itte. Alar Afinağa kitkänçe, Mäskäwdä, çirkäwgä barıp, pravoslav ataqaynıñ izge teläklären qabul itkän. Mäskäw mullası möselman sportçıların çaqırıp, izge yullar teläde mikän? Digän soraw quydı Sabircan. Bu sorawğa cawap birüçe ber keşe tabıldı. Ul, möselmannarğa mäçetkä baru mömkinlege birelgän bulğan, dip yaza. Şunduq, forumçılar Olimpiada uyınnarında qatnaşuçı millättäşlärebez xaqında söyläşä başlıy.

«Azatlıq» radiosı xäbärçeläre dönya küläm ütkärelä torğan sport yarışları häm anda kitkän 10 Tatarstan sportçısı xaqında söylägän ide inde. Afinağa Tatarstannan kitkännär arasında tatarlar da, başqa millät wäkilläre dä bar. Ä 500läp Rusiä sportçıları arasında kimendä 20-se bezneñ millättäşlärebez. Alarnı ber forumçı sanap çığarğan. Menä alarnıñ berniçäse : ilär: ikkinin Rinat Ays ulı (Saranski, grek-rim köräşe) Ganiev Renal Ramil ulı (Ufa, qılıç), Nasibullin Ruslan Rafik ulı (Ufa, qılıç), Sabırxucin Röstäm Vil ulı (Ufa, 5-le yarış), Safin Marat Möbin ulı (Mäskäw, tennis), Saitov Oleg Elekbay ulı (Samara, boks). Xatın-qızlar: Abasova Tamilä Räşid qızı (Mäskäw, velo-trek), Cihanşina Natalia Kamil qızı (Peterbur, gimnastika), Kabaeva Alinä Marat qızı (Taşkent, näfis gimnastika), Manürova Güzäl Tahir qızı (Saranski, irekle köräş), Sämitova Gölnara İskändär qızı (Çallı, yögerü ), Şakirova Elen Rafail qızı (Marı, basketbol), Şobuxova Liliä Bulat qızı (atletika). «Tatarskaya gazeta» saytınıñ konferensiäsendä qatnaşuçılar, yaqtaşlarıbıznıñ can atarları bulırğa kileşte. Olimpiä uyınnarınıñ barışın internet aşa da küzätep barırğa bula. Olimpiadanıñ räsmi internet säxifäse www.athens2004.com adresında urnaşqan. Ul ingliz, grek, fransuz tellärendä. Säxifä mäğlümatqa, räsemnärgä bik bay. Biredä yarışlarnıñ tärtibe, açılu tantanası, sportçılar turında küp sanlı mäğlümatlar, Olimpiä uyınnarınıñ tarixı, Gretsiä turında tarixi beleşelmälär urın alıp tora. Şunda uq, Olimpiadanıñ räsmi bilgese, anıñ cırı belän dä tanışırğa mömkin. Rusiä komandasınıñ räsmi saytı www.athens-2004.ru adresında urnaşqan. Biredä Rusiä sportçıları turında mäğlümatlar tuplanıp bara. Älegä qayber büleklär buş bulıp tora, çönki uyınnarda altın, kömeş medal’lärne sanaw başlanmağan, äle yarışlar ütmägän,, äñgämälär ütkärelmägän. Olimpiä uyınnarı belän qızıqsınuçılarğa internet küp törle mömkinlek birä. Mäsälän, yaratqan sportçılarğa teläktäşlek yözennän, alar öçen tawış birergä bula, Olimpiä uyınnarınıñ başlanuı belän qotlawlarnı da şuşı säxifädä yazıp qaldıra alasız. Adresın qabatlıym www.athens-2004.ru Şuşı säxifädä iñ populyar sportçılar arasında Marat Safin iseme dä oçrıy. Anıñ öçen älegä 10 keşe tawış birgän. Alina Kabayevanı, aña qarağanda, kübräk yaratalar. Alinägä 36 tawış birelgän. Boksçı Oleg Säitov öçen 6 keşe can ata. Äle uyınnar başlanmağan, ä tawış birülär inde bara. Olimpiada başlanğaç närsä bulır, ber atnadan yañadan qararbız. Olimpiä uyınnarınıñ näticälären, bigräktä Tatarstan sportçılarınıñ niçek çığış yasağannarın «Azatlıq» radiosın internet säxifäsendä, intertat.ru elektron gäzitendä, tatar.ru, tatinfo.ru saytların belep bara alarsız. «Azatlıq» radiosınıñ internet säxifäse www.azatliq.org adresında urnaşqan.

Olimpiä uyınnarı başlanıp qına kitsä, iñ polular saytlarnıñ berse – tatforum.at.tt bu atnada eşen waqıtlıça tuqtatıp tordı. Forumnıñ idäräçese «Millätçe» äfände belän elemtägä kerdek häm forumnıñ yabılıp toruı turında añlatmaların soradıq. «Millätçe» bik tıynaq keşe bulıp çıqtı, intervyu birergä telämäde. Cawapların xat belän genä yulladı. Şulay itep, «Millätçe» yazğança, şuşı könnärdä yabılıp torğan tatforum.at.tt säxifäse texnik qıyınlıqlarğa oçrağan. Tatforum.at.tt saytı tağın ber adresta urnaşaçaq: tatforum.com.ru. Forum comğa köçendä eşli başlar, dip wäğdä itä forumnıñ idäräçese «Millätçe».



Bikä Timerova.

XS
SM
MD
LG