Accessibility links

шимбә, 10 декабрь 2016, Казан вакыты 10:11

Mäskäw-Washington araları: inde doşman tügel, läkin älegä berektäş tä bulıp ölgermägän...


İnde elekkeçä doşman tügel, läkin älegä berektäş tä bulıp ölgermägän - Rusiäneñ saqlanu ministrı Sergey İvanov, üz ileneñ Amerika Quşma Ştatları belän xäzerge mönäsäbätlären menä şulay bäyäli. Ul bu xaqta, ike kön däwamında Piterburda amerikan saqlanu ministrı Donald Rumsfeld belän söyläşülär alıp barğannan soñ belderde. Anıñ süzlärenä qarağanda, ike il terrorğa qarşı köräş häm qorallar cäyeldermäw ölkäsendä urtaq qaraşta torsa da, Rusiä NATOnıñ Baltiq illäre aşa üz çigenä çığuın ber dä önäp betermi.

İke il arasındağı mönäsäbätlärne şulay - inde doşman da tügel, läkin älegä berektäş tä bulıp ölgermägän itep kürüen ministr İvanov yäkşämbe könne Piterburda oçraşunı yaqtırtqan xäbärçelärgä belderde. "Salqın suğış" tämamlanğannan birle Washington belän Mäskäw araları elek dönya eşlärendä yartı ğasır totqan üzäklegen yuğalttı, berdänber ere mämläkät bulıp qalğan Quşma Ştatlar xäzer töp iğtibarın islam radikalları tiräsendäge kierenkelekkä birä, iqtisadi problemalar kiçergän Rusiä isä kübräk eçke mäşäqätlärenä çumğan xäldä. Bu wäzğiat inde şaqtıy waqıt däwam itä. Londondağı Saqlanu wä İminlek mäs''älälären öyränü institutınıñ ölkän belgeçe Mark Joyce näq menä şuña iğtibar itä dä.

Audio, Mark Joyce

"Ägär dä sez beraz artqa, Rumsfeld häm İvanov arasında ike yıl elek barğan söyläşülärgä küz salsağız, xäzer söylängännärneñ zur öleşe anda da inde äytelgän buluın açıqlarsız. Monıñ säbäbe bik ğadi - Quşma Ştatlar bügenge köndä küpkä yuğarıraq strategik maqsatlar quya" di Londondağı belgeç. Piterburdağı söyläşülärdä Sergey İvanov, "salqın suğış" çorındağı doşmannarnı xäzer terrorğa qarşı köräş häm küpläp üterü qoralların cäyeldermäw tırışlıqları berläşterä digän fikeren qabatladı. Mäskäwneñ här xalıqara däräcädäge oçraşuı waqıtında, Çeçnädä alıp barğan suğışı uñayınnan üzeneñ terrorğa qarşı köräşüen telgä aluı xäzer inde ğädäti ber küreneşkä äylänep bara. Läkin şul da bar - Mäskäwneñ bu ölkädäge köräşne niçek itep kürüe, Washington bäyän itkän qaraştan şaqtıy ayırıla.

Audio, Mark Joyce

İnde telgä alınğan Mark Joyce, "terrorğa qarşı köräşü ölkäsendä urıslar belän bergä buluı xaqında beldergändä amerikannar bik saq bulırğa tieş, alar Mäskäwdän ayırmalı bularaq, şul köräşneñ turıdan-turı çäçän mäs''äläsenä bäyle buluın äytmi. Amerikannar ğomumän Rusiäneñ çäçän mäs''äläsen niçek xäl itü alımnarına kilgändä, küpmeder däräcädä räxätsezlek kiçerä" di Mark Joyce. Donald Rumsfeld häm Sergey İvanovnıñ qaraşları turı kilmägän ikençe ber ölkä - Baltiq illäreneñ şuşı yıl başında NATOğa kerüe. Amerikan yağı, bu NATO belän Rusiä arasında kierenkelek tudırmasqa tieş dip isäpläsä, İvanov Mäskäwneñ moña mönäsäbäten "sabır tiskäre" dip bäyäli häm "Baltiq illäreneñ NATOğa quşıluınnan ul oyışmanıñ iminlege artmadı, çönki ul illär iminlek tä''min itüçe tügel, alar fäqät şul iminlektäntän faydalanuçılar ğına" di.

Audio, Sergey İvanov

Rusiä saqlanu ministrı Sergey İvanov. Baltiq buyı illäre isä Rusiä ministrınıñ şuşı süzlären "iske cır" dip bäyäli.

Audio, Anvar Samost

"Baltiq xäbärläre xezmäte"ndä eşläwçe Anvar Samost, "Rusiä Estoniä, Latviä häm Litvanı NATO äğzası bulğan öçen yışraq tänqitlägän sayın, ul illärdäge ğadi xalıq, monıñ çınnan da şulay kiräklegenä kübräk inana" dip belderä.

Kärim Kamal
XS
SM
MD
LG